Այսօր ոստիկանություն բերման ենթարկված Վարդգես Գասպարիի հետ կապված՝ «Բանակն իրականում» ակցիայի մասնակիցները երթով հասան ոստիկանության Կենտրոնի բաժին:
Ինչպես «Առաջին լրատվական»-ի հետ զրույցում տեղեկացրեց, ԱԺ «Ժառանգություն» խմբակցության պատգամավոր Զարուհի Փոստանջյանը, իրեն թույլ չեն տվել մտնել ոստիկանություն: «Ինձ ասել էին, թե Գասպարիին ազատ կարձակեն երեք ժամ անց, անցել է երեք ժամ, բայց նրան ազատ չեն արձակում»,- նշեց Զարուհի Փոստանջյանը:
Նշենք, որ ակցիայի մասնակիցներին ոստիկանական խմբերը թույլ չեն տվել մոտենալ Կենտրոնի ոստիկանական բաժանմունքի շենքին` ասելով, որ այդպես է պետք:
Այժմ խաղաղ ցուցարարները կանգնած են ոստիկաններից կազմված ամուր պատի հետևում և շարունակում են «Ազատությո՛ւն Գասպարիին» վանկարկումները, իսկ թե Վարդգես Գասպարին երբ կլինի ազատության մեջ, ոչ ոք դեռ չգիտի:
