Թուրքական Zaman թերթի փոխանցմամբ՝ թուրքական ընդդիմության առաջնորդ, «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուն կուսակցության կենտրոնական գրասենյակում տեղի ունեցած 1.5-ժամանոց հանդիպումից հետո անդրադարձել է գիշերը տեղի ունեցած թուրք-քրդական բախմանը, որի արդյունքում զոհվել են 26 և վիրավորվել 22 թուրք զինծառայողներ.
«Էրդողանի կառավարությունը պետք է հրաժարական տա։ Էրդողանը պատասխանատվության բեռը չպետք է իր վրայից գցի ուրիշների վրա։ Տեղի ունեցածում գլխավոր պատասխանատուն կառավարությունն է։ Թուրքիայի կառավարությունն ի վիճակի չէ անհրաժեշտ ձևով պայքարել ահաբեկչության դեմ»։
Մյուս կողմից էլ՝ Քըլըչդարօղլուն համոզված է, որ այս հարցի լուծմամբ պետք է զբաղվի ոչ թե կառավարությունը, այլ՝ խորհրդարանը։ Նա խորհրդարանի խոսնակին կոչ է արել ձևավորել ահաբեկչական հանձնաժողով, ինչպես որ գոյություն ունի սահմանադրական հանձնաժողով, որը զբաղվում է նոր Սահմանադրության մշակմամբ։
Իսկ ահա «Ազգայնական շարժում» կուսակցությունը (ԱՇԿ) տեղի ունեցածի մեջ մեղադրում է նախկին ներքին գործերի նախարար, ներկայումս փոխվարչապետ Բեշիր Աթալային՝ պահանջելով նրա հրաժարականը։
Հիշեցնենք, որ 2010 թվականի օգոստոսի 25-ին Բեշիր Աթալայը հայտնել է, որ 1990-2009 թվականներին թուրքական զինված ուժերի և ոստիկանության կողմից վնասազերծվել է 27.905 PKK-ական: Սպանվել է 19.946 քուրդ զինյալ, որից 19.097-ը՝ տղամարդիկ, իսկ 792-ը` կանայք: 57 զոհվածի սեռը չի հաջողվել ճշտել:
Գերի է ընկել 23 վիրավոր և 4733 առողջ քուրդ զինյալ: Առողջ վիճակում գերեվարվածներից 4336-ը պատկանել են արական սեռին, իսկ 397-ը ներկայացրել են իգական սեռը: Անվտանգության ուժերին է հանձնվել 3203 քուրդ զինյալ, այդ թվում՝ 2874 տղամարդ և 329 կին:
Փաստորեն, վերջին 20 տարիներին Թուրքիայում վնասազերծվել է 26.329 տղամարդ և 1519 կին քուրդ զինյալ (գումարած 57 սեռը չպարզված անձինք): Աթալայի հաղորդմամբ` վնասազերծված քուրդ զինյալներից 1901-ը եղել են մինչև 20 տարեկան, 5025-ը` 20-30 տարեկան, 1440-ը` 31-40 տարեկան, իսկ 496-ը` 40-ից բարձր: Միևնույն ժամանակ, վնասազերծված 10.043 քուրդ զինյալների տարիքը մնում է անհայտ:
