Այսօր տեղի ունեցավ ՄԱԿ-ի Զարգացման ծրագրի սոցիալական ներառման վերաբերյալ մարդկային զարգացման տարածաշրջանային զեկույցի ՝ «Անցումային շրջանից դեպի ներառական հասարակություններ» և Հայաստանում սոցիալական բացառման համաթվի վերաբերյալ նյութի հաշվետվության շնորհանդեսը, որին բացման խոսքով հանդես եկան Հայաստանում ՄԱԿ-ի մշտական համակարգող, ՄԱԶԾ մշտական ներկայացուցիչ Դաֆինա Գերչևան և ՀՀ տարածքային կառավարման նախարարի առաջին տեղակալ Վաչե Տերտերյանը:
«Զեկույցը նպատակ ունի նախաձեռնել քննարկումներ տարածաշրջանում և նրանից դուրս, նաև դիտարկում է այն հիմնախնդիրները, որոնք պատճառ են հադիսանում մարդկանց հասարակությունից բացառելուն, և փորձում է լուծումներ առաջարկել նրանց հասարակության մեջ ներառելու համար»,- ասաց Դ. Գերչևան՝ այս ճանապարհը համարելով խոստումնալից: Ըստ նրա՝ զեկույցի նպատակն է նաև բարելավել մարդկային զարգացումը սոցիալական ներառման միջոցով:
Տեղեկացնենք, որ վեց երկրներում հավաքված տվյալների համաձայն՝ Տաջիկստանից բացի, բոլոր մյուս երկրներում ոչ թե տնտեսական բացառումը, այլ սոցիալական ծառայություններից օգտվելու հնարավորությունն է հանդիսանում հասարակության մեջ մարդկանց չներառելու գլխավոր պատճառը: Այս երկրներում իրականացված հետազոտությունների արդյունքները ենթադրում են, որ տարեցները, երեխաները, երիտասարդները, գյուղական շրջանների բնակիչները, գործազուրկներն ու թերի կրթություն ունեցողները ներառված չեն հասարակության մեջ:
Զեկույցի առաջարկությունների թվում են բարելավված միջին մասնագիտական կրթությունը և աշխատաշուկային ակտիվ քաղաքականությունը, տարեցների համար ծառայությունների արմատական բարելավումը, տարածաշրջանային մակարդակում սոցիալական պաշտպանվածության հիմնովին բարեփոխումը: Զեկույցը նաև կոչ է անում տարածաշրջանի բոլոր երկրներին մշակել սոցիալական ներառումը խթանող ռազմավարություն՝ հիմնված սոցիալական բացառման ենթարկվող մարդկանց և խմբերի փորձի վրա:
