2011 թ. պետական պարտքի ծավալը, նախորդ տարվա համեմատությամբ, ավելացել է 4.4%-ով և կազմել 3442 մլն ԱՄՆ դոլար: Գնահատումների համաձայն՝ պարտք/ՀՆԱ հարաբերակցությունը (33.1%) նախորդ տարվա համեմատությամբ կնվազի՝ պայմանավորված ՀՆԱ աճի առաջանցիկ տեմպերով: Կենտրոնական բանկի Ֆինանսական կայունության հաշվետվության մեջ ներկայացվում են պետական պարտքի կայունության 3 սթրես-սցենարներ:
Առաջին «սթրեսային» տարբերակով տնտեսական աճն ընդունվել է ԿԲ նախանշած միջինը՝ 4.6%, իսկ 2012-2014 թթ. համար ՀՆԱ իրական աճը կանխատեսվել է համապատասխանաբար 4.2, 4.5 և 4.8%: Սա այն դեպքում, եթե համաշխարհային տնտեսությունն իրեն կայուն-դրական դրսևորի, նաև կայուն լինեն մետաղների միջազգային գները, ու շարունակեն վերականգնվել արտերկրից ստացվող դրամական փոխանցումները:
Մյուս սցենարի դեպքում ՀՆԱ իրական աճի տարեկան 2% դանդաղում է կանխատեսվում, եթե միջազգային կառույցների համընդհանուր տնտեսական աճը նվազի, և պահանջարկի աճը լինի ավելի դանդաղ, քան ակնկալվում է: Այս սցենարի իրականանալու դեպքում թեև պարտքի կայունությունը բնութագրող պարտք/ՀՆԱ հարաբերակցությունը կվատթարանա, սակայն դեռևս չի գերազանցի սահմանային 50% արժեքը:
Մեկ այլ սցենարով ՀՀ դրամի փոխարժեքի աստիճանական, տարեկան 10% արժեզրկման դեպքում, համաշխարհային տնտեսության՝ կանխատեսվածից ցածր տնտեսական աճի պայմաններում կնվազի նաև ՀՀ հիմնական գործընկեր համարվող երկրների տնտեսական աճը, ինչպես նաև պահանջարկը, ինչը նկատելիորեն կազդի նաև ՀՀ արտահանման ծավալի վրա, արդյունաբերական մետաղների և նավթի գների վրա:
Այսինքն՝ իշխանությունների գովերգած տնտեսության դիվերսիֆիկացումն ի չիք կդառնա, քանի որ հանքարդյունաբերական հումքի գների անկման ճգնաժամը դեռ չհաղթահարած մեր տնտեսությունն էլ ավելի վատ վիճակի մեջ կհայտնվի: Դրան կնպաստի նաև Ռուսաստանից ստացվելիք մասնավոր տրանսֆերտների նվազումը:
Ըստ ԿԲ հաշվետվության, ազգային արժույթի աստիճանական արժեզրկման սցենարի իրականանալու դեպքում պարտքի կայունության ցուցանիշների էական վատթարացում է նկատվում, մասնավորապես՝ աճում են և՛ արտաքին պարտք /ՀՆԱ (թեև չի գերազանցում սահմանային 50%-ը), և՛ պարտքի սպասարկում/բյուջեի եկամուտներ ցուցանիշները, համաձայն որոնց՝ ՀՀ-ն տեղափոխվում է պարտքի միջին բեռ ունեցող երկրների շարքը:
