Ադրբեջանական ANS PRESS-ի փոխանցմամբ՝ երեկ ԱՊՀ երկրների կառավարությունների ղեկավարների նիստի արդյունքում ստորագրվել է ԱՊՀ ազատ առևտրային գոտու ձևավորման մասին պայմանագիրը։
Ռուսաստանի վարչապետ Վլադիմիր Պուտինն ընդգծել է, որ ԱՊՀ երկրները դեռևս 1994 թվականին էին կնքել ազատ առևտրի գոտու ձևավորման մասին պայմանագիր, սակայն այն ժամանակ այդ փաստաթուղթը չէր վավերացվել բազմաթիվ երկրների, այդ թվում՝ նաև Ռուսաստանի կողմից։ Դրա համար էլ պայմանագիրը փաստացիորեն չի աշխատել։
Նոր փաստաթղթի վրա տարվող աշխատանքները տևել են գրեթե 10 տարի։ Պուտինի խոսքերով՝ այս փաստաթուղթը արմատական հիմք կդնի ԱՊՀ շրջանակներում առևտրա-տնտեսական հարաբերությունների համար։
Այս պայմանագիրը ստորագրել են ԱՊՀ անդամ 8 երկրների կառավարության ղեկավարներ. Հայաստան, Ռուսաստան, Ուկրաինա, Բելառուս, Ղազախստան, Ղրղզստան, Մոլդովա, Տաջիկստան։
Պայմանագիրը հրաժարվել են ստորագրել Ադրբեջանը, Ուզբեկստանը և Թուրքմենստանը։
Փաստորեն, կարելի է կարծել, որ Ադրբեջանը շարունակում է իր «ԱՊՀ-ական» բոյկոտը։ Հիշեցնենք, որ այս տարվա օգոստոսի 9-ին Ադրբեջանի ու Ռուսաստանի նախագահներ Իլհամ Ալիևն ու Դմիտրի Մեդվեդևը հանդիպել էին Սոչիում՝ քննարկելու ղարաբաղյան հակամարտության կարգավորման հարցը։ Սակայն դա անցավ անարդյունք, ինչից դժգոհ Ալիևը բոյկոտեց սեպտեմբերի սկզբին Դուշանբեում տեղի ունեցած ԱՊՀ երկրների հոբելյանական գագաթնաժողովը։
