Այսօր ՀՀ սփյուռքի նախարարության «Արի տուն» ծրագրի շրջանակներում Հ. Իգիթյանի անվան գեղագիտության ազգային կենտրոնում բացվեց սփյուռքահայ երեխաների նկարների՝ «ՀՀ անկախության 20-ամյակին նվիրված «Հայրենիք, քեզ այսպիսին եմ տեսնում» ցուցահանդես, որին ներկայացվեցին աշխարհի տարբեր երկրների (ԱՄՆ, Ռուսաստան, Վրաստան, Ռումինիա, Մակեդոնիա, Լատվիա, Ավստրալիա) 15 համայնքներից 107 աշխատանքներ: Մրցույթին մասնակցել են երեք տարիքային խմբեր` 6-11, 11-14, 14-17 տարեկան երեխաներ և պատանիներ: Գլխավոր մրցանակի (դրամական մրցանակի տեսքով) արժանացել է Սիդնեյից 16-ամյա Ռոզմերի Հալքպլեանի ստեղծագործությունը:
Հայաստանի գեղագիտական կենտրոնի գեղարվեստական ղեկավար Հասմիկ Հակոբյանը, կարևորելով ցուցահանդեսը, նշեց, որ Հայաստանը չունի աշխարհագրական սահմաններ. «Հայաստանն անծայրածիր սփռված է, և այսօր մենք տեսնում ենք` ինչ նշանակություն ունի մեր մարմնի ֆիզիկական այն մասը, ոը կոչվում է Հայաստան, և որը գտնվում է սփյուռքում: Իսկ այդ մասն իրեն ավելի կապված կարող է զգալ հայրենիքի հետ, եթե մենք հաճախ կազմակերպենք նմանատիպ միջոցառումներ»,- ասաց Հասմիկ Հակոբյանը:
«Առաջին լրատվականը» Հրանուշ Հակոբյանից հետաքրքրվեց` ինչ հինգ գրավիչ բաղադրիչ կարող է նշել, որը կարող է սփյուռքում գտնվող պատանուն բերել Հայաստան. «Առաջին` հայերեն լեզուն, քանի որ նրանք ամեն քայլափոխի լսում են, երկրորդը՝ Մասիս սարը, երրորդը` Էջմիածինը, չորրորդը` Սևանը, հինգերորդը` Եղեռնի հուշարձանը»,- ասաց Հրանուշ Հակոբյանը` հավելելով, որ այս թվարկածներն ամբողջ հայ ժողովրդի համար են ցանկալի, սիրելի և ընկալելի:
Նա նաև նշեց, որ ցուցահանդեսին մասնակցած պատանիները և մանուկները Հայաստանը չեն տեսել, և Հայաստանի մասին նրանց պատկերացումները սահմանափակվում են իրենց ուսուցիչների և ծնողների` Հայաստանի մասին պատմող պատմություններով: Հրանուշ Հակոբյանը այս 107 երեխաներին կանչեց Հայաստան, որպեսզի նրանք հայրենի հողը զգալով ավելի լավ նկարներ նկարեն, Հայաստանն ավելի պայծառ ու գեղեցիկ տեսնեն:
Ի դեպ, սփյուռքահայ մանուկները և պատանիները Հայաստանը հիմնականում տեսնում էին Մասիս սարի, եկեղեցիների, նռան, Եղեռնի միջոցով, և քիչ էին նկարները, որոնք լուսավոր էին պատկերում հայրենիքը:
