Հայաստանի հավաքականի և Երևանի «Փյունիկի» գլխավոր մարզիչ Վարդան Մինասյանն այսօր հանդիպեց լրագրողների հետ և ամփոփեց Հայաստանի ազգային հավաքականի ելույթները «Եվրո-2012»-ի ընտրական փուլում: Մինասյանը հիշեցրեց, թե ինքն ասել էր, որ մինչև արդյունքի հասնելը մեծ աշխատանք կա կատարելու հավաքականում, և, սկսած Բելառուսի հետ խաղից, իրականացվեց սերնդափոխություն. «Կարևորը կորիզ ձևավորելը, խաղային ձեռագիր ձեռք բերելն էր, և այսօր, եթե նայում ենք հավաքականին, ապա այն ունի իր դեմքը: Հիմնականում երիտասարդներով է կազմված կորիզը, որոնց հետ են նաև Ռոման Բերեզովսկին և Սարգիս Հովսեփյանը: Այս թիմի պոտենցիալն ավելի մեծ է, և այս լավ արդյունքը լավ խաղի շնորհիվ է: Սկզբում մեզ փորձը չէր բավականացնում, բայց աստիճանաբար ամեն ինչ կարգավորվեց»:
Հարցին՝ գո՞հ է հավաքականի ցույց տված արդյունքներից, Մինասյանը պատասխանեց, որ դա կարելի է դիտարկել երկու առումով: Նախատեսված ծրագրերի հետ համեմատած՝ ըստ Մինասյանի, արդյունքները գոհացուցիչ են. «Բայց երբ գալիս հասնում ես մի կետի, երբ հանդիպումը վճռական է և չի ստացվում, ապա կա հիասթափություն: Ընդհանուր առմամբ գոհ եմ»:
Վարդան Մինասյանը խոսեց նաև վճռական Իռլանդիա-Հայաստան խաղից, որը ավարտվեց Հայաստանի հավաքականի ցավալի պարտությամբ: Մինասյանը նկատեց, որ այդ խաղում ներկայացված կազմի մասին է շատ խոսվել, և ընդգծեց, որ ինքն ունի 18 հոգի, որոնցից ընտրում է 11 ֆուտբոլիստների. «Ես այն մարզիչներից չեմ, որ ասում են, թե հաղթող կազմը չեն փոխում: Դա հնում էին անում: Ամեն խաղի դու կարող ես փոխել մարտավարությունը: Իռլանդիան կենտրոնական զոնայում չէր խաղում, և սխալ կլիներ խաղալ երկու հենակետային կիսապաշտպանով»:
Մինասյանը նկատեց, որ մինչև Բերեզովսկու կարմիր քարտն ամեն ինչ լավ էր ընթանում, և պետք էր արագ դուրս գալ պաշտպանությունից. «Ես խաղից հետո ասացի, որ իրենք կարող են գլուխները բարձր պահել»:
«Եվրո-2012»-ի ընտրական փուլի 10 խաղերը վերլուծելով՝ Մինասյանը նշեց, որ չի ստացվել Հայաստան-Ռուսաստան խաղը, ինչն իր պատճառներն ուներ, իսկ բեկումնային է եղել Երևանում Սլովակիայի հետ խաղը:
Հարցին՝ ի՞նչ գործոններով է զիջել Հայաստանի ազգային հավաքականը Ռուսաստանին և Իռլանդիային, և արդյո՞ք դեռ կադրային խնդիրներ կան, Մինասյանը պատասխանեց. «Իհարկե դեռ կան, մենք դեռ ճանապարհի կեսին ենք: Մենք դեռ լրիվ չենք կայացել ու դեռ շատ շատ անելիքներ ունենք: Կոնկրետ Իռլանդիայի հետ Երևանում չբավականացրեց փորձը»:
Մինասյանը նաև կարևորեց մարզչական շտաբի աշխատանքը, ֆուտբոլիստների շատ բարձր մարդկային որակները. «Ես Իռլանդիայի հետ խաղից հետո նրանց ասել եմ, որ իրենք շատ լավ ֆուտբոլիստներ են, շատ բարձր մարդկային որակներ ունեն և ամեն խաղի ապացուցում են, որ մեծ նվիրումով են գալիս հավաքական: Մի խոսքով` նրանք պրոֆեսիոնալներ են»: