«Ժողովուրդ» օրաթերթն այսօր ստացել է հոկտեմբերի մեջ արդեն երրորդ դատական ծանուցումը: Հոկտեմբերի 12-ին Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի դատավոր Ռուբեն Ափինյանը վարույթ է ընդունել ՀՀ կուրորտաբանության և ֆիզիկական բժշկության գիտահետազոտական կենտրոնի տնօրեն Բենիկ Հարությունյանի հայցն` ընդդեմ «Ժողովուրդ» օրաթերթի:
Վերջինս օրաթերթից պահանջում է 2 միլիոն դրամ և ևս 244.000 դրամ` փաստաբանական և դատական ծախսերի համար:
Այս առնչությամբ «Առաջին լրատվականը» զրուցեց «Ժողովուրդ» օրաթերթի գլխավոր խմբագիր Թագուհի Թովմասյանի հետ, ով մեզ հետ զրույցում մասնավորապես ասաց, թե այն, որ Բենիկ Հարությունյանն իսկապես արատավորված բարի համբավ ունի, նախ, դրա մասին որևէ գրավոր տեղեկություն կամ տեղեկություն չունի, և հետևաբար դժվար է ասել, թե որ նյութով կամ նյութի որ հատվածով է կոնկրետ արատավորվել դոկտորի բարի համբավը:
Նա շեշտեց, որ «Ժողովուրդ» օրաթերթը հրապարակել է երկկողմանի կարծիք, այսինքն` կա բողոքող կողմ, որին «քցել է» Բենիկ Հարությունյանը` նրանից վերցնելով 218 հազար դոլար, երբ փորձել են համատեղ բիզնես դնել, հետո չի ստացվել:
«Թերթը ներկայացրել է նաև Բ.Հարությունյանի ու նրա փաստաբանի տեսակետը, այսինքն` տվյալ դեպքում թերթը հանդես է եկել որպես ամբիոն ու ամբիոնին մեղադրելն առնվազն ծիծաղելի է»,- հավելեց Թ.Թովմասյանը` ընդգծելով, որ թերթերի դեմ վերջին շրջանի դատական հայցերով ու այդ գործելաոճով փորձ է արվում լուծել մեկ խնդիր, այն է` վերահսկելի պահել տպագիր մամուլը:
Նրա խոսքով` հեռուստաընկերություններն այսօր գրեթե ամբողջությամբ գտնվում են իշխանության վերահսկողության տակ, ինտերնետային կայքերի մի մասը կրկին նույն վիճակում է, հետևաբար մնացել է վերահսկելի դարձնել տպագիր մամուլը` սնանկացման եզրին հասցնելու ճանապարհով, այսինքն` կամ փակում եք թերթը, կամ ենթարկվում մեր խաղի կանոններին:
Թ.Թովմասյանը շեշտեց, որ «Ժողովուրդ»-ը չի գնա որևէ զիջման ու չի ընկրկի և շարունակելու է աշխատել այնպես, ինչպես աշխատել է` նյութերը գրելով երկկողմանի ու անելով դատողություններ, որոնք բխում են իրական ու իրավական հիմքերից ու ներկայացնելով իրավիճակի անաչառ լուսաբանումը:
«Եթե սա կխանգարի որևէ չինովնիկի կամ որևէ քաղաքական ուժի, ապա թող իրենք մտածեն»,- հավելեց թերթի գլխավոր խմբագիրը:
