Թուրքական Radikal թերթի փոխանցմամբ՝ Թուրքիայի ներքին գործերի նախարար Իդրիս Նաիմ Շահինն այսօր տվյալներ է հրապարակել Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) վնասազերծված զինյալների մասին։
Նա նշել է, որ վերջին շրջանում թուրքական բանակի, ոստիկանության ու ժանդարմերիայի իրականացրած գործողությունների արդյունքում վնասազերծվել է 3400 PKK-ական, որից 2400-ը հանձնվել են։
Նշվում է, որ վերջին շրջանում շատացել են PKK-ականների հանձնվելու դեպքերը. դա պայմանավորված է նաև PKK կողմից մի շարք քաղաքացիական անձանց սպանելու հանգամանքով, ինչը դժգոհության տեղիք է տալիս։
Իդրիսը նշել է, որ վերջին մեկ ամսվա ընթացքում իրենց հաջողվել է հայտնաբերել ու առգրավել մեծ քանակությամբ պայթուցիկ, որը պատկանել է PKK-ին։ Մասնավորապես, սեպտեմբերի 23-ին Բինգյոլում առգրավվել է 120 կիլոգրամ պայթուցիկ, դրանից մեկ շաբաթ անց 100 կիլոգրամ պայթուցիկ է առգրավվել արդեն Դիարբեքիրում։ Հոկտեմբերի 4-ին էլ Անթալիայում կալանվել է պայթուցիկով լի մի բեռնատար։
Հիշեցնենք, որ սեպտեմբերի վերջին Թուրքիայի բոլոր 81 նահանգներում կարմիր (ահաբեկչական) ահազանգ է հնչեցվել, քանի որ հետախուզության ստացած տվյալներով՝ PKK-ն ռումբերով զինված 40 մարդ էր գործուղել Թուրքիա պայթեցումներ իրականացնելու համար։ Նշվում էր, որ նախապես այդ անձինք համապատասխան պատրաստություն են անցել Հյուսիսային Իրաքում գտնվող PKK ճամբարներում, և նրանց թիրախում էին Թուրքիայի խոշոր քաղաքները։
