Հոկտեմբերի 12-13-ը Թբիլիսիում կայացել է Սևծովյան տնտեսական համագործակցության խորհրդարանական վեհաժողովի 37-րդ նստաշրջանը: ՍԾՏՀ ԽՎ-ում հայաստանյան պատվիրակության ղեկավար Գագիկ Մինասյանն այսօր լրագրողների հետ հանդիպման ընթացքում ներկայացրեց ԽՎ-ի արդյունքները:
Նա տեղեկացրեց, որ խորհրդարանական վեհաժողովի ընթացքում քննարկվել են հարկային համակարգի բարեփոխումները: Քննարկումների ընթացքում հայկական պատվիրակությունը ներկայացրել է մաքսային համակարգի բարեփոխումները, հարկային համակարգում կատարվող փոփոխությունները, որոնք, Մինասյանի խոսքերով, նպատակ ունեն նվազեցնելու շփումները տնտեսվարողի և հարկային համակարգի աշխատողների միջև:
«Քննարկումը բավականին ակտվ է անցել, միաձայն ընդունվել է փաստաթուղթը, որն արդեն կքննարկվի նոյեմբերի վերջի վեհաժողովի նիստի ընթացքում»,- մանրամասնեց Մինասյանը:
Հարկային և մաքսային բարեփոխումների առումով Սևծովյան համագործակցության ԽՎ-ի անդամ երկրների միջև համեմատություն անցկացնելու համար, ըստ Մինասյանի, պետք է հաշվի առնել այն հանգամանքը, որ այնտեղ կան երկրներ, որոնք խորհրդային անցյալ ունեն, կան երկրներ, որոնք սոցիալիստական անցյալ ունեն, իսկ երկրներ էլ կան, որոնք այդ անցյալներից զերծ են: Հետևաբար, Մինասյանի խոսքերով` այդ առանձնահատկությունները հաշվի առնելով, Հունաստանի կամ Թուրքիայի բարփոխումներն ու ձեռքբերումները համեմատելի չեն Հայաստանում, Մոլդովայում, Վրաստանում, Ադրբեջանում առկա իրավիճակի հետ. «Մենք ավելի հեշտ է` համեմատվենք այս երկրների հետ, և վերջին շրջանում մենք հարկային և մասքային ոլորտում բավականին ինտենսիվ աշխատանք ենք կատարում, բայց այստեղ աշխատանքն այնքան մեծ է, որ դեռ շատ աշխատանքն կա` արևմտյան երկրների չափանիշներին հասնելու համար»:
Մինասյանը նաև հավելեց, որ ԽՎ-ից հետո հայաստանյան պատվիրակությունն այցելել է Վիրահայոց թեմի առաջնորդարան, որտեղ բավականին փոխվել է իրավիճակը, առաջնորդարանը վերանորոգվել է, ինչն, ըստ Մինասյանի, չափազանց կարևոր է Թբիլիսիում ապրող 82 հազար հայերի համար: Նա նաև տեղեկացրեց, որ ԱԺ պատվիրակությունն այցելել է Վրաստանում Հայաստանի դեսպանություն:
