Apple ընկերության բաժնետոմսերի գինը բարձրացել է ռեկորդային մաքսիմումի` հասնելով 422 դոլարի: Այս մասին հաղորդում է Bloomberg գործակալությունը:
Օրվա արդյունքներով, iPhone 4S սմարթֆոնները վաճառքի հանելուց հետո ընկերության բաժնետոմսերն աճել են ավելի քան 3%-ով: Ընկերության հիմնադիր Սթիվ Ջոբսի մահից հետո՝ 2011թ. հոկտեմբերի 5-ից ընկերության արժեթղթերի արժեքը բարձրացել է 12%-ով:
Վերլուծաբանները կարծում են, որ iPhone 4S-ը շաբաթվա վերջում վաճառքի ռեկորդ կսահմանի: Սպասվում է, որ առաջիկա հանգստյան օրերին կվաճառվի iPhone 4S-ի 2-3 մլն կրկնօրինակ: Համեմատության համար նշենք, որ 2010թ. առաջին շաբաթվա ընթացքում վաճառվել է iPhone 4-ի 1.7 մլն օրինակ:
Ավելի վաղ հաղորդվում էր, որ նոր սմարթֆոնները ռեկորդ են սահմանել պատվերների թվով: