«Ժողովրդավարական հայրենիք» կուսակցության նախագահ, Հայ ազգային կոնգրեսի ներկայացուցիչ Պետրոս Մակեյանը «Ժողովրդական կուսակցության» առաջնորդ Տիգրան Կարապետյանի` ՀԱԿ-ին միանալու մտադրությունը նորմալ է գնահատում և համարում է, որ այս պարագայում գործում է՝ «լավ է ուշ, քան երբեք» սկզբունքը: Նման տեսակետ Մակեյանը հայտնեց «Առաջին լրատվականի» հետ զրույցում:
«Կարապետյանի նման գաղափարը նորմալ եմ համարում, որովհետև գալու է մի պահ, երբ բոլորն էլ հանգելու են այդ մտքին»,- համոզմունք հայտնեց նա:
Հարցին` ի՞նչ կտա ՀԱԿ-ին Տիգրան Կարապետյանի միացումը, Պետրոս Մակեյանը պատասխանեց. «Այստեղ զուտ մաթեմատիկական հաշվարկներով չի կարելի առաջնորդվել: Չգիտեմ` ՀԱԿ-ը «Ժողովրդական կուսակցության» միացումից ինչ կշահի կամ կկորցնի, սակայն փաստն ինքնին դրական եմ գնահատում»:
Անդրադառնալով ՀԱԿ-ի վարկանիշի` իշխանությունների հետ երկխոսությունից հետո նվազելու մասին խոսակցություններին`«Ժողովրդավարական հայրենիք» կուսակցության նախագահը կտրականապես հերքեց նման փաստի գոյությունը: «Մեր շուրջօրյա հանրահավաքները ցույց տվեցին, որ ՀԱԿ-ը կայուն ուժ է, և նրա վարկանիշն անսասան է»,- ամփոփեց Մակեյանը:
Հիշեցնենք, որ օրեր առաջ ԺԿ նախագահը չէր բացառել, որ հնարավոր է` միանա ՀԱԿ հոկտեմբերի 28-ին կայանալիք հանրահավաքին:
