ԵԱՀԿ-ում ՀՀ առաքելության ղեկավարի կարգավիճակով Աշոտ Հովակիմյանը հոկտեմբերի 7-ին հրաժեշտի հանդիպում է ունեցել ԵԱՀԿ Գլխավոր քարտուղար Լամբերտո Զաննիերի հետ: Հոկտեմբերի 11-ին ՀՀ մշտական ներկայացուցչին ընդունեց ՕՊԵԿ-ի Զարգացման հիմնադրամի /OFID/ գլխավոր տնօրեն Սուլեյման Ալ-Հերբիշը:
Հունգարիայում դիվանագիտական առաքելության ավարտի կապակցությամբ դեսպան Աշոտ Հովակիմյանը հոկտեմբերի 4-ին հանդիպումներ է ունեցել Հունգարիայի նախագահ Պալ Շմիտի, խորհրդարանի նախագահ Լասլո Կյովերի և ԱԳ նախարարության պետքարտուղարի տեղակալ Պետեր Շտարայի հետ:
Հանդիպումների ընթացքում հունգարական կողմն իր գոհունակությունն ու շնորհակալությունն է հայտնել դեսպան Հովակիմյանին Հունգարիայում ՀՀ դեսպանի պաշտոնում ծավալած արդյունավետ գործունեության համար` նշելով, որ Հայաստանի և Հունգարիայի միջև հարաբերությունները այդ տարիների ընթացքում դինամիկ զարգացում են ապրել և երկկողմ, և բազմակողմ ձևաչափերում:
Նախագահ Պալ Շմիտը բարձր գնահատեց դեսպանի դերը վերջին հինգ տարիների ընթացքում հայ-հունգարական հարաբերությունների դինամիկ զարգացման և ամրապնդման գործում: Նախագահ Շմիտը նշեց, որ մեծ նշանակություն է տալիս ԵՄ Արևելյան գործընկերության ծրագրի իրականացմանը, և այդ շրջանակներում ակնկալում է նաև Հայաստանի հետ հարաբերությունների հետագա զարգացում:
Հունգարիայի խորհրդարանի նախագահ Լասլո Կյովերը նույնպես գոհունակություն հայտնեց Հայաստանի և Հունգարիայի միջև ձևավորված հարաբերությունների առնչությամբ, ինչպես նաև պարոն Հովակիմյանին պարգևատրեց Հունգարիայի խորհրդարանի հուշամեդալով` ի նշան հայ-հունգարական խորհրդարանական համագործակցության ընդլայնման:
Սլովակիայում դիվանագիտական առաքելության ավարտի կապակցությամբ դեսպան Աշոտ Հովակիմյանը հոկտեմբերի 5-ին Բրատիսլավայում հանդիպումներ է ունեցել Սլովակիայի նախագահի աշխատակազմի արտաքին կապերի վարչության պետ դեսպան Յան Շոթի, ԱԳ նախարարության պետքարտուղար Միլան Եժովիցայի և ԱԳՆ Արևելյան Եվրոպայի, Հարավային Կովկասի և Կենտրոնական Ասիայի տարածաշրջանային վարչության պետ Մարիան Յակուբոցիի հետ:
Հանդիպումների ընթացքում սլովակյան կողմը բարձր է գնահատել Աշոտ Հովակիմյանի` Սլովակիայում ՀՀ դեսպանի պաշտոնում ծավալած արդյունավետ գործունեությունը` նշելով, որ Հայաստանի դեսպանն իր լուրջ ներդրումն է ունեցել տարբեր ձևաչափերում երկկողմ հարաբերությունների զարգացման գործում:
Սլովակիայի Նախագահի աշխատակազմի արտաքին կապերի վարչության պետ Յան Շոթը Հայաստանի դեսպանին հայտնել է, որ իր երկիրը կարևորում է երկկողմ հարաբերությունների հետագա ամրապնդումը, ինչպես նաև իրավապայմանագրային դաշտի ընդլայնման և փոխայցելությունների իրականացման անհրաժեշտությունը:
