Այսօր սպանված զինծառայողների ծնողները, իրավապաշտպանները, ակտիվ երիտասարդները հավաքվել էին նախագահական նստավայրի մոտ` Սերժ Սարգսյանից պատասխան ստանալու ակնկալիքով: Երբ մի քանի զինծառայողների ծնողներ մոտեցան նստավայրի ճաղերին և պահանջում էին, որ Սերժ Սարգսյանն ընդունի իրենց, նրանց մոտեցավ ՀՀ պաշտպանության նախարարության ներկայացուցիչ Վարդան Ղուկասյանը, ով ասաց, որ բոլորին անխտիր` լրագրողներին և սպանված զինծառայողների ծնողներին հրավիրում է Ռազմական ոստիկանություն, որտեղ զինծառայողների ծնողները կստանան իրենց հարցերի պատասխանները:
Տեղեկացնենք, որ այս պահին Ռազմական ոստիկանությունում կոլեգիայի նիստ է, որտեղ ինչպես տեղեկացրեց Վարդան Ղուկասյանը, ներկա են բոլոր զորամասերում գրանցված դեպքերի քննիչնները, և որ նրանք անխտիր բոլոր հարցերի պատասխանները կտան:
Սակայն բանակում խաղաղ պայմաններում սպանված Տիգրան Օհանջանյանի մայրն ասաց, որ ծնողները պատասխանի են սպասում միայն Սերժ Սարգսյանից, քանի որ բազմիցս խնդրել են իրենց հարցերին պատասխան տալ, բայց ապարդյուն:
Այժմ Վարդան Ղուկասյանը համոզում է ծնողներին միասին գնալ Ռազմական ոստիկանություն, բայց ծնողները չեն համաձայնում:
