Facebook-ում ստեղծված «Բանակն իրականում» քաղաքացիական նախաձեռնությունն այսօր` հոկտեմբերի 14-ին, նախագահական նստավայրի առջև անցկացնելիք ինքնաբուխ բողոքի ակցիայի ժամանակ մեկ անգամ ևս բարձրաձայնելու է, որ հայկական բանակում վիճակն օրհասական է և տագնապալի. «Առաջին լրատվական»-ի հետ զրույցում այս մասին ասաց նախաձեռնության ներկայացուցիչ Լալա Ասլիկյանը:
«Բողոքի ակցիան ինքնաբուխ է, մենք այն անցկացնելու որոշումը կայացրել ենք միայն երեկ երեկոյան, երբ հայտնի է դարձել, որ Իջևանի զորամասում գրանցվել է զինվորի հերթական մահվան դեպքը: Բանակում անպատժելիության մթնոլորտ է, և միանշանակ է, որ ոլորտում համակարգային փոփոխություններ են անհրաժեշտ: Փոփոխություներ են անհրաժեշտ նաև օրենսդրության մեջ: Բանակում պետք է ներդրվեն մարդու իրավունքների պաշտպանության, թափանցիկության մեխանիզմներ»,- նկատեց Լալա Ասլիկյանը:
Նա նաև տեղեկացրեց, որ միջոցառման` խիստ ինքնաբուխ լինելու պատճառով իրենք հատուկ ելույթներ և կարգախոսներ նախապես չեն պատրաստել, Սերժ Սարգսյանին էլ հատուկ նամակ չեն հանձնելու:
Նշենք, որ զինվոր էր մահացել Իջևանի զորամասում հոկտեմբերի 13-ին՝ ժամը 15-ի սահմաններում։ Նա ժամկետային զինծառայող, 21-ամյա շարքային Արամ Աշոտի Մելքոնյանն է: Նա Երևանի բնակիչ էր, զորակոչվել էր 2011 թ. առաջին զորակոչի ժամանակ Նոր Նորքի զինկոմիսարիատից: