Erasmus+ ծրագրի շրջանակում մեկնարկել է Երևանի թատրոնի և կինոյի պետական ինստիտուտի և Մոնպելիեի Պոլ Վալերի համալսարանի եռամյա համագործակցությունը։ Նախաձեռնության նպատակն է զարգացնել միջազգային ակադեմիական և ստեղծագործական համագործակցությունը թատրոնի, կինոյի, աուդիովիզուալ արվեստների և նոր մեդիաների ոլորտներում։ Ծրագրի շրջանակում երկու բուհերի ուսանողները կմասնակցեն համատեղ ստեղծագործական արվեստանոցների, որոնք կխթանեն փորձի փոխանակումը, միջառարկայական համագործակցությունը և նոր ստեղծագործական մեթոդների յուրացումը։
Հուլիսի 6-ից Երևանում անցկացվում է առաջին համատեղ ստեղծագործական արվեստանոցը, որը միավորել է 20 ուսանողի՝ 10-ը Հայաստանից և 10-ը՝ Ֆրանսիայից։ Դասընթացները վարում են Մոնպելիեի Պոլ Վալերի համալսարանի դասախոս-հետազոտողներ Լորան Բերժեն և Վենսան Դևիլը։
Երևանի թատրոնի և կինոյի պետական ինստիտուտի ռեկտոր Սառա Նալբանդյանի խոսքով՝ այս համագործակցությունը կարևոր քայլ է բուհի միջազգայնացման ռազմավարության իրականացման գործում։
«Ծրագիրը մեր ուսանողներին հնարավորություն է տալիս աշխատել միջազգային ակադեմիական միջավայրում, ծանոթանալ եվրոպական կրթական և ստեղծագործական փորձին, ինչպես նաև ներկայացնել իրենց մասնագիտական ներուժը միջազգային գործընկերներին։ Վստահ եմ, որ նման համագործակցությունները ոչ միայն նպաստում են մասնագիտական զարգացմանը, այլև հիմք են ստեղծում երկարաժամկետ ստեղծագործական և ակադեմիական կապերի ձևավորման համար»,- նշում է Սառա Նալբանդյանը։
Համագործակցության երկրորդ փուլը նախատեսված է 2026 թվականի աշնանը։ Այդ ժամանակ ծրագրի 10 հայ մասնակիցները կմեկնեն Մոնպելիե՝ շարունակելու համատեղ աշխատանքը, իսկ արվեստանոցը կվարեն Երևանի թատրոնի և կինոյի պետական ինստիտուտի դասախոսները։
Արվեստանոցի ծրագիրը հիմնված է երկակի հիբրիդության սկզբունքի վրա՝ համադրելով թատրոնն ու կինոն, տեսական ուսումնասիրությունն ու գործնական աշխատանքը։ Մասնակիցները կվերլուծեն ամերիկացի ռեժիսոր Քելի Ռայխարդտի ֆիլմերը, կստեղծեն վիդեոաշխատանքներ և կզարգացնեն փերֆորմատիվ ու վիդեոինստալացիոն նախագծեր։ Ծրագրում ներառված են նաև գործողության դեկոմպոզիցիայի, նարատիվ և դերասանական ֆրագմենտացիայի, ինչպես նաև ստոպ-մոշն տեխնիկայի վերաբերյալ գործնական վարժություններ։
