Մերձավոր Արևելքի վեց երկիր հայտնել է, որ դարձել է հարձակումների թիրախ։ Դրանք են՝ Կատարը, Օմանը, Արաբական Միացյալ Էմիրությունները, ինչպես նաև Հորդանանը, Բահրեյնը և Քուվեյթը:
Իրանի Իսլամական հեղափոխության պահապանների կորպուսը (ԻՀՊԿ) հայտարարել է, որ ոչնչացրել է հրամանատարական-դիսպետչերական կենտրոնը և անօդաչու թռչող սարքերի անգարները ԱՄՆ դաշնակից Հորդանանում, ինչպես նաև հարվածներ է հասցրել ամերիկյան ռադարային կայանին և հրթիռային կայանքներին Քուվեյթում: Նրանք նաև հայտարարել են, որ Օմանում գրոհել են ամերիկյան ավիակիրների աջակցության և լիցքավորման հարթակները, ինչպես նաև Կատարում ոչնչացրել են ինքնաթիռների տեխնիկական սպասարկման կենտրոնն ու հրամանատարական կետը:
Կատարը, որն ավելի վաղ հայտարարել էր, որ չի գործի որպես միջնորդ, քանի դեռ գտնվում է հրետակոծության տակ, հայտնել է, որ ընկնող բեկորներից վիրավորվել է երեք մարդ, այդ թվում՝ մեկ երեխա: Կատարում հայտարարել են, որ Իրանը կրում է հարձակման «լիակատար իրավական պատասխանատվությունը»:
Նույնպես կիրակի օրը, Արաբական Միացյալ Էմիրությունները հայտարարել են իրենց սահմաններից դուրս հրթիռային սպառնալիքների հայտնաբերման մասին, իսկ Բահրեյնը հայտնել է իրանական մի քանի օդային հարձակումներ որսելու մասին։ Հորդանանը հայտնել է հրթիռային հարվածների, իսկ Օմանը՝ անօդաչու սարքերի հարձակումների մասին։
Ավելի ուշ, Քուվեյթի բանակը հայտնել է հարվածների հետևանքով առաջացած վնասների մասին և հայտարարել, որ նավթային հորատման հարթակի վրա իրականացված հարձակման հետևանքով տուժել է մի բանվոր:
Օմանը հայտարարել է, որ կանչել է Իրանի դեսպանին՝ իր բողոքն արտահայտելու երկու շրջաններում անօդաչու սարքերի հարձակումների կապակցությամբ, իսկ Օմանում ԱՄՆ դեսպանատունը կոչ է արել Դուքմում և Մուսանդամում գտնվող իր քաղաքացիներին մնալ իրենց տներում:
Նշենք, որ Իրանն ավելի վաղ հայտարարել է, որ հարվածներ է հասցրել Բահրեյնում, Հորդանանում և Քուվեյթում գտնվող ամերիկյան ռազմական թիրախներին։
