Սաուդյան արքայազն Թուրքի Ալ-Ֆայսալը հայտարարել է, որ Իրանը պետք է պատասխան տա ԱՄՆ-ում սաուդյան դեսպանի դեմ նախապատրաստված մահափորձի համար: Ինչպես հաղորդում է Reuters գործակալությունը, արքայազնի խոսքով, բավարար ապացույցներ կան, որ հենց Իրանի պաշտոնական կառուցվածքներն են կազմակերպել մահափորձը:
Իրանին պատասխանատվության ենթարկելու մասին ավելի վաղ հայտարարել էին նաև ԱՄՆ-ը և Մեծ Բրիտանիան: Մասնավորապես՝ նրանք պատրաստվում են լրացուցիչ պատժամիջոցներ սահմանել Իրանի կառավարության դեմ: Իսկ ԱՄՆ-ը, Սաուդյան Արաբիան և մի շարք այլ երկրներ պատրաստվում են դիմել ՄԱԿ-ի Անվտանգության խորհուրդ:
Իրանն իր հերթին հերքում է իր հասցեին հնչած մեղադրանքները և դա համարում ԱՄՆ կողմից պատրաստված շոու:
