Ռուսական Советский спорт թերթն անդրադարձել է երեկ Դուբլինում կայացած «Իռլանդիա-Հայաստան» հանդիպմանը, որն ավարտվեց դաշտի տերերի հաղթանակով (2։1).
«Ճակատագիրն Իռլանդիայի հավաքականին վերադարձրեց պարտքը։ 2010 թվականին տեղի ունեցած Աշխարհի առաջնության ուղեգիր պարգևող անցումային խաղերում Ջովաննի Տրապատոնիի գլխավորած Իռլանդիայի հավաքականն ուժերը չափեց Ֆրանսիայի հավաքականի հետ։
Այդ ժամանակ Իռլանդիայի հավաքականը դարձավ զոհը մրցավար Մարտին Հանսոնի սխալի, որը Վիլյամ Գալասի հաղթական գոլի ժամանակ չէր նկատել Թիերի Անրիի կողմից ձեռքով խաղի միջադեպը։ Այս պատմությունը գործնականում կրկնվեց երեկ Դուբլինում կայացած Հայաստանի հետ խաղում։ Միայն թե այս անգամ մրցավարական սխալը ուրախություն պարգևեց իռլանդացիներին։
Անցումային խաղերի ուղեգիր տվող «Իռլանդիա-Հայաստան» հանդիպման 26-րդ րոպեին իռլանդացիների հարձակվող Սայմոն Քոքսը խորքից ստացած գնդակը կասեցրեց ձեռքով, ինչն անկատ մնաց հանդիպման մրցավարների (թե՛ գլխավոր, թե՛ եզրային) կողմից։ Ապա Քոքսը հարվածեց դարպասին, սակայն նրան ընդառաջ եկած դարպասապահ Բերեզովսկին այն կասեցրեց «ձեռքերով», սակայն՝ արդեն տուգանային հրապարակից դուրս։
Դրան անմիջապես հետևում է կարմիր քարտը, ինչն անվիճելի կլիներ, եթե դրանից ակնթարթներ առաջ ձեռքով չխաղար իռլանդացի հարձակվողը։ Հավանաբար, դա ճակատագիր է, ֆուտբոլային աստվածներն իռլանդացիներին վերադարձրին այն, ինչ նրանցից խլել էին գրեթե երկու տարի առաջ։
2009 թվականի նոյեմբերին տեղի ունեցած «Ֆրանսիա-Իռլանդիա» անցումային պատասխան հանդիպման լրացուցիչ ժամանակում ֆրանսիացիները կարողացան հաղթական գոլը խփել այն բանից հետո, երբ մրցավար Հանսոնը չնկատեց գոլային փոխանցման հեղինակ դարձած Թիերի Անրիի կողմից ձեռքով խաղը։
Այն ժամանակ իռլանդացիները մեծ աղմուկ բարձրացրին։ Նրանք Թիերի Անրիին անվանեցին խաբեբա, իսկ հանդիպման մրցավարին՝ կույր։ Բացի այդ՝ նրանք բարձրաձայնեցին ՖԻՖԱ-ի ու ՈՒԵՖԱ-ի կողմից իրենց դեմ նյութված դավի մասին։
Բայց երբ համանման իրավիճակում հայտնվեց իրենց հարձակվողը, իռլանդացիներից ոչ մեկը խաղի ժամանակ չխոստովանեց, որ մրցավարը սխալ է։ Բերեզովսկու հեռացումը բավական մեծ առավելություն էր տալիս նրանց այդ խաղում, որում նրանք պարտավոր էին գոնե մեկ միավոր վաստակել՝ անցումային խաղերին մասնակցելու իրավունք ստանալու համար։
Քոքսը, սակայն, ոչինչ չհայտնեց մրցավարին։ Հավանաբար, այնքան էլ հեշտ չէ պահպանել ֆեյր-փլեյի (ազնիվ խաղ) կանոնները, երբ կշեռքի նժարի վրա է դրված Եվրոպայի առաջնությունը։ Ճակատագիրն այս անգամ Իռլանդիայի հավաքականին փոխհատուցեց անցյալի անարդարության համար»։
