Վրացական GHN լրատվական գործակալության փոխանցմամբ՝ վրացի միլիարդատեր և գործարար Բիձինա Իվանիշվիլին նոր հայտարարություն է տարածել, որում շոշափել է մի շարք այժմեական խնդիրներ.
«Չնայած նրան, որ Վրաստանի իշխանություններն իրենց կողմից ղեկավարվող ԶԼՄ-ների միջոցով համառորեն փորձում են իմ անունը կապել ռուսական քաղաքականության հետ և ինձ ռուսական գործակալի պիտակ կպցնել, ոչ ոք չի կարող բերել դա հաստատող փաստեր, քանի որ այդպիսի բան գոյություն չունի։
Ես 9 տարի չեմ գտնվել Ռուսաստանում և այդ ընթացքում որևէ հեռախոսազանգ չեմ ստացել ռուսական քաղաքական շրջանակներից, որևէ հանդիպում չեմ ունեցել ռուս քաղաքական գործիչների հետ։ Վրաստանի իշխանությունների համար դժվար կլինի դա մարսել՝ չնայած նրանց դա պետք էլ չէ, քանի որ քաջ գիտեն, որ ես որևէ կապ չունեմ ռուսական քաղաքականության հետ։ Ես մտադիր չեմ արդարանալ իշխանությունների այդ կեղտոտ բամբասանքների ու անհեթեթ մեղադրանքների առջև։
2008 թվականից հետո, երբ Վրաստանի իշխանությունները կեղծեցին ընտրությունները, ես ամեն կերպ խզեցի իմ կապերը նրանց հետ։ Այդ ժամանակ իմ դեմ լծվեցին պետական մեքենան, ԶԼՄ-երը, սկսվեցին սպառնալիքներն ու շանտաժը, սակայն նրանք ոչինչ չկարողացան անել։ Նրանք չկարողացան գտնել ոչ մի սև հետք և իմ գործունեության վրա լծակներ, և չեն էլ կարող գտնել, քանի որ այդպիսի բան պարզապես գոյություն չունի։
Եվ քանի որ որոշել եմ վերադառնալ քաղաքականություն, ես անպայմանորեն գալու եմ իշխանության։ Ես մշտապես իրագործում եմ այն, ինչ խոստանում եմ։ Մշտապես կատարում եմ ստանձնածս պարտավորությունները։ Ես վրաց ժողովրդին խոսք եմ տվել, որ գալու եմ իշխանության, հետևաբար՝ անպայմանորեն գալու եմ։ Իսկ երբ դա տեղի կունենա՝ ես իմ ողջ փորձը, ողջ ռեսուրսը կուղղեմ Վրաստանի վերածնմանն ու բարգավաճմանը, Վրաստանի յուրաքանչյուր քաղաքացու բարեկեցությանը»։
Հիշեցնենք, որ 5.5 միլիարդ դոլար կարողություն ունեցող Բիձինա Իվանիշվիլիին երեկ զրկել են Վրաստանի քաղաքացիությունից՝ դա պատճառաբանելով նրանով, որ Վրաստանի քաղաքացիություն ստանալուց հետո նա ստացել է նաև Ֆրանսիայի քաղաքացիություն։
