ԱՄՆ-ում սոցիալական անհավասարության դեմ պայքարող՝ «Գրավեք Ուոլ Սթրիթը» ակցիայի մասնակիցները պատրաստվում են հոկտեմբերի 11-ին ցույց կազմակերպել Նյու Յորքի առավել ունևոր ընտանիքների տների մոտ:
Ինչպես հաղորդում է Fox News-ը, 400-800 ցուցարարներ իրենց բողոքը կարտահայտեն մասնավորապես Ռուպերտ Մերդոկի և Դևիդ Կոհի տների մոտ:
Ցուցարարները պատրաստվում են իրենց հետ բերել բանկային քարտեր, որոնցում կնշեն, թե որքան քիչ են սկսելու վճարել քաղաքի ունևոր բնակիչները, երբ այս տարի դադարի գործել հարուստների համար լրացուցիչ երկտոկոսանոց հարկը:
Agence France-Presse գործակալությունը նշում է, որ Բոստոնում և Նյու Յորքում բողոքի ցույցերը սկսվել են սեպտեմբերի 17-ին, նմանատիպ ակցիաներ են ընթանում նաև այլ քաղաքներում: Դրանց մասնակիցներն իրենց համարում են ամերիկացիների 99%-ի ներկայացուցիչ, որոնք դիմակայում են 1%-ը կազմող հարուստներին: Այսօր առավոտյան Բոստոնի ոստիկանությունը ձերբակալել է շուրջ 100 ցուցարարների: