News Georgia-ի փոխանցմամբ՝ ԱՄՆ-ի ազգային-դեմոկրատական ինստիտուտը (NDI) սեպտեմբերի 9-21-ը ներքաղաքական ու արտաքին քաղաքական տարբեր խնդիրների շուրջ հարցախույզ է անցկացրել Վրաստանում։ Հարցախույզին մասնակցել է 2425 մարդ, սխալ լրացված հարցաթերթիկների մասնաբաժինը կազմել է 3 տոկոս։
Հարցախույզի մասնակիցների 9 տոկոսը լիովին համաձայն է այն պնդման հետ, որ իշխանություններն իրենց համար կարևոր փոփոխություններ են կատարում, 53 տոկոսը մասնակիորեն է համաձայն դրա հետ։ Դրա հետ համակարծիք չէ 18 տոկոսը, իսկ 12 տոկոսը մասամբ համաձայն չէ։
Ամենախնդրահարույց ոլորտ, որը պահանջում է բարեփոխումների իրագործում, ճանաչվել է գյուղատնտեսությունը՝ 35 տոկոս, ապա գալիս են կրթությունը՝ 26 տոկոս, հարկային համակարգը՝ 23 տոկոս, ընտրական համակարգը՝ 20 տոկոս և դատական համակարգը՝ 20 տոկոս։ Դրա հետ մեկտեղ հարցվածների 62 տոկոսը ազգային խնդիր է համարում աշխատատեղերի խնդիրը, երկրորդ տեղում գնաճն ու ինֆլյացիան են՝ 42 տոկոս, իսկ երրորդ տեղում՝ տարածքային ամբողջականության խնդիրը՝ 31 տոկոս, և գրեթե նույնչափ էլ աղքատությունը։
Հարցվածների 39 տոկոսը կարծում է, որ Վրաստանն արդեն իսկ ժողովրդավարական երկիր է, սակայն բարելավման կարիք է զգում, 28 տոկոսը կարծում է, որ Վրաստանը դեռևս ժողովրդավարական երկիր չէ, սակայն զարգանում է այդ ուղղությամբ, 15 տոկոսի կարծիքով էլ Վրաստանը միայն հասարակության մի մասի համար է ժողովրդավարական։ 5 տոկոսն էլ կարծում է, որ Վրաստանը երբեք չի եղել և չի էլ լինելու ժողովրդավարական երկիր։
51 տոկոսը կողմ է Վրաստանի խորհրդարանի՝ Քութայիս փոխադրմանը, 28 տոկոսը դեմ է դրան։ 60 տոկոսը դեմ է, որ պատգամավորների թիվը 150-ից հասցվի 190-ի։ Դրան աջակցում է միայն 8 տոկոսը։
Վրաստանի ինքնիշխանության համար Ռուսաստանի վարած ներկայիս քաղաքականությունը սպառնալից է որակել 63 տոկոսը։ Իսկ Ռուսաստանի նկատմամբ Վրաստանի վարած քաղաքականությունը 46 տոկոսը որակել է որպես անընդունելի։ 74 տոկոսն աջակցում է ՆԱՏՕ-ին Վրաստանի անդամակցությանը, իսկ 76 տոկոսը՝ ԵՄ-ին Վրաստանի անդամակցությանը։