Ադրբեջանական 1news.az-ի փոխանցմամբ՝ Ադրբեջանի ԱԳՆ-ի անվտանգության հարցերով վարչության երկրորդ քարտուղար Էլչին Հուսեյնլին Բաքվում տեղի ունեցած միջազգային կոնֆերանսի ժամանակ հայտարարել է, որ ԵԱՀԿ Մինսկի խմբի համանախագահող երկրները արհեստականորեն ձգձգում են Ղարաբաղյան հակամարտության կարգավորման գործընթացը.
«Դժբախտաբար, Ղարաբաղյան հակամարտության կարգավորմամբ զբաղվող միջազգային միջնորդները՝ ԵԱՀԿ Մինսկի խմբի համանախագահող երկրները, հակամարտության կարգավորմանը նպաստելու փոխարեն, պայմաններ են ստեղծում դրա արհեստական ձգձգման համար։
Նրանք չեն կարող արժանիորեն կատարել իրենց վրա դրված առաքելությունը և իրենց ներդրումն ունենալ հակամարտության կարգավորման գործընթացում։ Նրանք աչք են փակում միջազգային իրավունքի նորմերի վրա։ Դա անթույլատրելի է»։ Հուսեյնլին նաև հայտարարել է, որ Ռուսաստանի և Հայաստանի միջև կապերը տարածաշրջանային անկայունության «պատճառ են հանդիսանում»։
Քննադատության իր բաժնեմասից չի խուսափել նաև ԵՄ-ը. «ԵՄ-ը երկակի մոտեցում է ցուցաբերում տարածաշրջանային հակամարտությունների նկատմամբ։ ԵՄ-ը մի կողմից ճանաչում է մի երկրի տարածքային ամբողջականությունը, իսկ մյուս կողմից հատուկ մոտեցում է ցուցաբերում այլ երկրի նկատմամբ։ Ոչ մեկին պատիվ չի բերում մեկ պետության տարածքային ամբողջականության ճանաչումն ու այլ պետության տարածքային ամբողջականության խախտման վրա աչք փակելը»։
Նույն կոնֆերանսում ադրբեջանցի պատգամավոր Էլման Մամեդովը հայտարարել է. «Այսօր ԵԱՀԿ Մինսկի խմբի համանախագահող երկրները հայտարարում են, թե ճանաչում են Ադրբեջանի տարածքային ամբողջականությունը։ Սակայն ԱՄՆ-ը ֆինանսական աջակցություն է ցուցաբերում Հայաստանին ու Լեռնային Ղարաբաղին, Ռուսաստանը զենք է մատակարարում Հայաստանին ու Լեռնային Ղարաբաղին, իսկ Ֆրանսիան էլ Հայաստանին նայում է իր քրոջ նման։ Մի՞թե ՄԱԿ-ն ու ՆԱՏՕ-ն ուժ չունեն փոքրիկ Հայաստանի հարցը լուծելու համար»։
Հիշեցնենք, որ օրեր առաջ Ադրբեջանի առաջին նախագահ Այազ Մութալիբովը դժգոհել էր Ղարաբաղյան հակամարտության կարգավորման ձգձգումից՝ դա պայմանավորելով նրանով, որ ԵԱՀԿ Մինսկի խմբի համանախագահող երկրները քրիստոնյա երկրներ են։
