Եվրամիության կարգադրության համաձայն՝ սուլիչները, փչովի գնդակները, ինչպես նաև «մագնիսային ձկնորսություն» խաղը համարվել են վտանգավոր երեխաների առողջության համար: Գիտնականներին զարմացրել է այդ որոշումը, իսկ արտադրողները հայտարարել են, որ դա կհանգեցնի այդ խաղալիքների գների բարձրացմանը:
Ինչպես հաղորդում է The Daily Telegraph պարբերականը, ԵՄ հրահանգում ասվում է, որ մինչև 8 տարեկան երեխաներին առանց ծնողների հսկողության արգելվում է փուչիկ փչել, քանի որ նրանք պատահաբար կարող են կուլ տալ դրանք: Նույնը վերաբերում է սուլիչներին:
ԵՄ-ն նաև կպահանջի արտադրողներից և վաճառողներից մինչ այժմ անվտանգ համարվող խաղալիքների վրա տեղեկացնել դրանց հնարավոր վտանգների մասին:
Սոցիոլոգները կարծում են, որ խաղալիքների անվտանգության հետ կապված նման արգելքները երեխայի կյանքը վերահսկելու մի ձև են. երեխաները այդպիսով զրկվում են իրեն համար նորը բացահայտելու, սովորելու և խաղերով իրենց ժամանակն անցկացնելու հնարավորությունից:
Բացի այդ, ԵՄ-ն պատրաստվում է արգելք դնել բարձր ձայն ունեցող խաղալիքների վրա:
ԵՄ նոր հրահանգը խիստ անհանգստություն է առաջացրել խաղալիք արտադրողների շրջանում, քանի որ այժմ նրանք պետք է անցնեն հատուկ թանկ թեստեր: Մի շարք մատակարարներ չեն բացառում, որ առաջիկա Ծննդյան տոներին իրենք ստիպված կլինեն բարձրացնել ապրանքների գները:
