Ադրբեջանական APA լրատվական գործակալության փոխանցմամբ՝ Ադրբեջանի ԱԳՆ-ի անվտանգության հարցերով վարչության երկրորդ քարտուղար Էլչին Հուսեյնլին Բաքվում տեղի ունեցած միջազգային կոնֆերանսի ժամանակ հայտարարել է, որ լատվիական ընկերությունը զենք է վաճառում Հայաստանին։ Կոնֆերանսին մասնակցել են ՎՈՒԱՄ (Վրաստան, Ուկրաինա, Ադրբեջան, Մոլդովա) և Բալթյան երկրների ներկայացուցիչները։
Կոնֆերանսում Հուսեյնլին հայտարարել է. «Այսօր Հայաստանն ի լուր աշխարհի հայտարարում է, թե Ադրբեջանը տենդագին սպառազինվում է։ Այսօր Հայաստանի զինված ուժերի անձնակազմը «48,884 մարդ է», իսկ Լեռնային Ղարաբաղինը՝ «45,000 մարդ»։ Միասին ստացվում է «93,000 մարդ»։ Մինչդեռ Ադրբեջանի զինված ուժերի անձնակազմը կազմում է «70,000 մարդ»՝ համաձայն 1992 թվականին ստանձնած պարտավորության։
Ադրբեջանի գնած սպառազինությունն «ուղղված է» էներգետիկ ենթակառույցների անվտանգության ապահովմանը։ Մինչդեռ Հայաստանը «միակողմանիորեն և անհիմն» Ադրբեջանին մեղադրում է տարածաշրջանում ռազմական հավասարակշռության խախտման մեջ։ Սակայն պետբյուջեների վերլուծությունը ցույց է տալիս, որ Հայաստանն ավելի ռազմականացված երկիր է։
Նախորդ տարի Հայաստանը գնել է 16,000, իսկ նախորդ տարիներին՝ 78,000 «Կալաշնիկով» տիպի ինքնաձիգ։ Ինչի՞ համար է նրան անհրաժեշտ այս զենքը։ Դա «վկայում է», որ Հայաստանը պատրաստվում է ոչ թե խաղաղության, այլ՝ պատերազմի։ Հայաստանին զենք վաճառելու գործընթացում ներգրավված է լատվիական Latspeceksports ընկերությունը»։