ՀԱԿ համակարգող Լևոն Զուրաբյանը Ազատության հրապարակում հավաքվածներին դիմելով` նշեց, որ այսօր պետք է միասին որոշում ընդունեն հետագա անելիքների մասին, ինչը քննարկվել է օր ու գիշեր:
Նա տեղեկացրեց, որ երեկ ուշ գիշերին ՀԱԿ կենտրոնական շտաբի նիստ է կայացել, որը վարել է Լևոն Տեր-Պետրոսյանը, և նրանք հանգամանորեն վերլուծել են ստեղծված իրավիճակը, կայացվել է որոշում, ինչը այսօր կներկայացվի ժողովրդի դատին:
Զուրաբյանն ասաց, որ Հայաստանում լարված մթնոլորտ է, բռնապետությունը բլոկադայի է ենթարկել Հայաստանը, միայն թե թույլ չտան ժողովրդին մասնակցել ՀԱԿ հանրահավաքներին. «Իշխանությունը չի խորշում սեփական ժողովրդի իրավունքները բռնաբարող ցանկացած քայլի գնալուց: Նման պայմաններում չափազանց մեծ է սխալի գինը»:
Զուրաբյանը նշեց, որ իրենց պայքարը դեռ չի տվել վերջնական արդյունք, սակայն պայքարը շարունակվելու է մինչև կատարյալ արդյունքը:
Նա հիշեցրեց, թե ինչ ծանր վիճակ էր 2008 թ. մարտի 1-ից հետո, և թե ինչպես ՀԱԿ-ը հակառակ արգելքի՝ վերականգնեց հանրահավաք անելու իրենց իրավունքը, այնուհետև՝ երթ անելու, իսկ այս տարի մարտին ազատեցին Ազատության հրապարակը ոստիկանական օկուպացիայից և պարտադրեցին, որ ազատ արձակվեն բոլոր քաղբանտարկյալները. «Իսկ 8-օրյա հանրահավաքներով ստեղծել ենք մի իրավիճակ, որում բռնապետական այս համակարգը այլևս երբեք չի համարձակվի Մարտի 1-ի նման ոճիր իրագործել սեփական ժողովրդի դեմ»:
Զուրաբյանը ժողովրդին կոչ արեց՝ հավատարիմ մնալ իրենց կնքած 8-օրյա ուխտին և հավատարիմ լինել Հայաստանը մեր ժողովրդին արժանի երկիր դարձնելու խոստմանը:
