Նավթամթերքի արտահանման մեկնարկից հետո Ադրբեջանը քննարկում է Հայաստանի հետ առևտրատնտեսական կապերի ընդլայնման հնարավորությունը այլ ոլորտներում․ տարեվերջյան ասուլիսին հայտարարել է արտգործնախարար Ջեյհուն Բայրամովը։
Նախարարը ընդգծել է, որ Ադրբեջանի և Հայաստանի առևտրային հարաբերությունները կառուցվում են զրոյից, և Բաքուն պատրաստ է քննարկել Երևանի առաջարկները։
«Նավթամթերք արտահանելու առաջարկն ընդունվել է, մատակարարումները սկսվել են։ Մենք կարծում ենք, որ հնարավոր է ընդլայնել առևտրային կապերը», – ասել է Բայրամովը։
Նախարարը նաև ընդգծել է, որ ադրբեջանական արտահանման նկատմամբ Հայաստանում արձագանքները տարբեր են․
«Մի կողմից, արտահանումը դրականորեն է ընդունվել, մյուս կողմից՝ որոշակի դժգոհություն առաջացրել։ Հայկական հասարակության մեջ կան նաև կոչեր Ադրբեջանից մատակարարումների դեմ», – ընդգծել է Բայրամովը։
