News Georgia-ի փոխանցմամբ՝ Նիկոլա Սարկոզին տասնյակ հազարավոր անձանց առջև հրապարակավ ելույթ է ունեցել Թբիլիսիի «Ազատության» հրապարակում՝ հայտարարելով, որ Ֆրանսիան աջակցում է Վրաստանի տարածքային ամբողջականությանը, ինքնիշխանությանն ու անկախությանը.
«Ֆրանսիան չի հաշտվել այն արդյունքների հետ, որոնք առկա են։ Ես այստեղ եմ և հանդիսավորությամբ հաստատում եմ, որ Ֆրանսիան աջակցում է Վրաստանի տարածքային ամբողջականությանն ու ինքնիշխանությանը։ Ես հաստատում եմ ստորագրված համաձայնագրերի (2008 թվականի օգոստոս) ի կատար ածմանը հետևելու վերաբերյալ իմ ստանձնած պարտավորությունները։
Վրաց ժողովուրդն իրավունք ունի ինքնուրույն ընտրելու իր ճանապարհն ու իր դաշնակիցներին։ 2008 թվականի օգոստոսին ես նորից Թբիլիսիում էի, և խորհրդարանի առջև հավաքվել էին տասնյակ հազարավոր անձինք, որոնք իրենց բողոքն էին արտահայտում երկրին հասցված անարգանքի կապակցությամբ։
Երեք տարի անց Վրաստանում շարունակում են մնալ փախստականները և ի հակառակ ամեն տիպի տրամաբանության ու ստանձնած պարտավորությունների՝ այստեղ (Աբխազիայում ու Հարավային Օսիայում) շարունակում են մնալ զորամասեր, ընդ որում՝ դրանց քանակն աճում է։
Մենք կարողացանք կանգնեցնել պատերազմը, սակայն դա չի նշանակում, թե իսկական խաղաղություն ենք հաստատել։ Ես չեմ դադարեցնելու իրավիճակի կայունացմանն ուղղված իմ ջանքերը»։
