«Տեսնում ենք այն, ինչ սպասելի էր` կա առճակատման խորացում, սակայն նախընտրական մրցավազքը մի փոքր ուշացած է, և այս անգամ համեմատաբար պասիվ է, միակ բանը որ կարող ենք արձանագրել` հանրահավաքն է, որի ազդեցությունը հասարակության վրա ևս բազմաբնույթ մեկնաբանությունների տեղիք է տալիս»,- այսօր լրագրողների հետ հանդիպման ժամանակ կարծիք հայտնեց Աժ պատգամավոր Վարդան Խաչատրյանը:
Նա նկատեց, որ այդ պասիվությունը պայմանավորված է նրանով, որ արդեն իսկ գոյություն ունեն հաստատուն քաղաքական կոնֆիգուրացիաներ` ՀԱԿ և իշխանություն, և մինչև նախընտրական վերջին` եռման փուլ մտնելը` նոր կոնֆիգուրացիաներ ձևավորելու հարցը ուշանում է, ինչը, ըստ Խաչատրյանի, նաև պայմանավորված է Ռոբերտ Քոչարյանի հնարավոր վերադարձով. «Համարյա համոզված եմ, որ Քոչարյանի մուտքը տեղի կունենա, որովհետև իրավիճակը գնալով դառնում է պարտադրող»:
Ինչ վերաբերում է առաջիկայում քաղաքական նոր կոնֆիգուրացիաների ձևավորմանը, Խաչատրյանը նշեց, որ դեռևս պարզ չէ, թե ինչ նոր կոնֆիգուրացիաներ կառաջանան դաշտում, բայց դա բացառված չէ, քանզի Հայաստանում ներկայումս խառնակ իրավիճակ է` էլիտան միմյանց չի վստահում, ու նման իրավիճակից, ըստ Խաչատրյանի, «երկիրը դուրս է գալիս բարոյապարկեշտ մարդկանց առանցքի ստեղծմամաբ»` մարդկանց խումբ, որին կհավատա զանգվածը. «Նոր ուժերի ձևավորումը բավականին մոտիկ է»:
Նախընտրական շրջանի կուլմինացիան, ըստ Խաչատրյանի, հստակ չէ, թե երբ կլինի, քանզի կան այնպիսի հարցեր, ինչպիսիք են ղարաբաղյան խնդիրը, պատերազմը վերսկսելու ռեալ քայլեր Ադրբեջանի կողմից, տնտեսական վիճակի սրացում, որոնք կարող են հանկարծակի և ամբողջապես կտրուկ փոխել իրավիճակը և բերել էսկալացիայի:
Հարցին, թե որքանով է հավանական, որ իր նշած առճակատման սրացումը հանգեցի մարտիմեկյան դեպքերի կրկնությանը, Խաչատրյանը պատասխանեց, որ նման սցենար կլինի այն դեպքում, երբ երկիշխանության իրավիճակ ստեղծվի, և եթե ընդդիմությանը հաջողվի բարձրացնել այնպիսի ժողովրդական ալիք, որի դեմ իշխանությունն անզոր լինի. «Բայց հստակ է, որ զանգվածը, որ գալիս է այդ ակցիաներին, ավելի կիրառական գործողությունների է միտված, քան ընդդիմադիր ղեկավարությունը»:
Հայաստանում արաբական սցենարների կրկնության հավանականությանն անդրադառնալով` Վարդան Խաչատրյանը նշեց, որ հնարավոր վերսկսվելիք պատերազմը հայ հասարակության ակտիվության դեպրեսանտ է հանդիսանում, ինչպես նաև հայ հասարակությունը մտածողությամբ էլ նման չէ արաբներին. «Արաբական սցենարը սակավ հավանական է Հայաստանում»:
Հարցին, թե ինքը մասնակցելո՞ւ է խորհրդարանական ընտրություններին և արդյոք իրեն տեսնո՞ւմ է ապագա խորհրդարանում, Խաչատրյանը պատասխանեց, որ առայժմ իր մասնակցության առումով որոշում չի կայացրել, իսկ այդ որոշումը պայմանավորված է լինելու այն զարգացումներով, որոնք կլինեն Հայաստանում:
ՀԱԿ-ի հետ համագործակցության դաշտ Խաչատրյանը ևս դեռ չի տեսնում: