Թուրքական Ntvmsnbc կայքի փոխանցմամբ՝ Սիրիայի նախագահ Բաշար Ալ-Ասադն ընդունել է Թուրքիայի գլխավոր ընդդիմադիր ուժ հանդիսացող Ժողովրդա-հանրապետական կուսակցության (ԺՀԿ) փոխնախագահ Ֆարուք Լոգոօղլուի գլխավորած պատվիրակությանը։
Հանդիպման ժամանակ Ասադը հայտարարել է. «Ես չեմ փոխվել, Էրդողանն է փոխվել, որը միակողմանի պատժամիջոցներ է ձեռնարկում Սիրիայի նկատմամբ, երբ անգամ ՄԱԿ-ը դա չի անում։ Իմ կարծիքով՝ ԱՄՆ-ը դեմ է Թուրքիայի և Սիրիայի միջև բարեկամությանը, իսկ Թուրքիան էլ վերջին շրջանում վերածվել է Վաշինգտոնի շահերն առաջ տանողի։ Անկարան վերածվել է Օբամայի խոսնակի։
Թուրքիայից եկողներն ինձ շարունակ ասում են. «Օբաման այսպես է ասում, Օբաման այնպես է ասում»։ ԱՄՆ-ը Դամասկոսում դեսպան ունի։ Ես այդ ամենն արդեն նրանից լսել եմ։ Թուրք եղբայրները մեզ կրկնում են այդ նույն խոսքերը։ Թունիսի, Լիբիայի և մեր օրինակները ցույց են տալիս, որ խնդիրը ժողովրդավարություն հաստատելը չէ, մեր աղբյուրներին տիրանալն է։
Թուրքիան զենք է մատակարարում սիրիացի ապստամբներին։ Ապստամբների մոտ մենք հայտնաբերել ենք մեծ քանակությամբ թուրքական ծագմամբ զենք։ Թուրքիան հանդես է գալիս «Մուսուլման եղբայրներ» կազմակերպության օգտին, որը սպառնալիք է ներկայացնում երկրի աշխարհիկ ռեժիմին։ Սիրիայի համար «Մուսուլման եղբայրները» նույնն են, ինչ Թուրքիայի համար Քրդստանի աշխատավորական կուսակցությունը (PKK):
Թուրքիան 30 տարի շարունակ նոր Սահմանադրություն չի ընդունել, փոխարենը նա Սիրիայից պահանջում է 3 ամսվա ընթացքում ձեռնարկել լայնամասշտաբ ժողովրդավարական բարեփոխումներ։ Մենք հատ-հատ անում ենք դա, և դա անում ենք ոչ թե նրա համար, որ Արևմուտքն է այդպես ցանկանում, այլ որ այդպես է ցանկանում մեր ժողովուրդը»։
