Այսօր և վաղը հանրահայտ քրեական սիրո պատմությունը կլինի Համազգային թատրոնի բեմում: Բրիտանական խորհրդի աջակցությամբ «Հայ ֆեստ» միջազգային թատերական փառատոնի շրջանակում շուրջ երկու օր կներկայացվի Միացյալ Թագավորության Proto-type թատրոնի «Երրորդ անձ`Բոննի և Քլայդ» բեմադրությունը: Այս մասին այսօր լրագրողների հետ հանդիպման ժամանակ խոսեց բեմադրության ռեժիսոր Պետեր Պետրելիան: Ըստ ռեժիսորի` նա հաճախ է բացասական կերպարներին գլխավոր հերոս ներկայացնում, ինչը և այս դեպքում է արել:
«Բեմադրությունը երեք տարի շարունակ թալանող և սպանություններ կատարող Բոննի Փարկեր և Քլայդ Բարոու զույգի մասին է: Նրանց պատմությունը ավարտվեց հանկարծ, երբ 1934 թվականին Լուիզիանայում ոստիկանությունը դարանակալեց և սպանեց նրանց: Ոչ ոք տեղյակ չէ բոլոր մանրամասներին, սակայն նրանց քրեական սիրո պատմությունը դարձավ հայտնի լեգենդ` ամբողջ աշխարհում: Վկայությունների, անձնական պատմությունների, բամբասանքների, վավերացումների, վիդեոների, նկարների հիման վրա վերաշարադրվում են այն դրդապատճառները, որոնց շնորհիվ այս տխրահռչակ սիրահարների կյանքի ու մահվան պատմությանը տարիներ շարունակ հմայում է հանդիսատեսին»,- պատմեց Պ. Պետրելիան` հավելելով, որ այս ներկայացումը հետաքրքիր է , քանի որ ցույց է տալիս կյանքի և մահու հարաբերակցությունը:
Տեղեկացնենք, որ «Հայ ֆեստ» միջազգային թատերական փառատոնը մեկնարկել է հոկտեմբերի 1-ին և ավարտվելու է հոկտեմբերի 8-ին, այս ընթացքում փառատոնին հյուր են եկել 30 թատերախմբեր`18 երկրներից:
Այս տարի առաջին անգամ փառատոնը ներկայացնում է tango de soledade եռաչափ գրաֆիկայով տասը րոպեանոց պարային բեմադրությունը:
