ԼՂՀ նախկին արտգործնախարար Արման Մելիքյանն այսօր լրագրողների հետ հանդիպման ժամանակ անդրադարձավ Հայաստանում կատարվող ներքաղաքական զարգացումներին: Նա հիշեցրեց, որ ինքը մեկ անգամ ասել է, որ Սերժ Սարգսյանի դիրքերը առավել շահավետ են, քանզի Ռ. Քոչարյանը կաջակցի Սերժ Սարգսյանին` ընդդեմ Տեր-Պետրոսյանի, իսկ վերջինս էլ կաջակցի Ս. Սարգսյանին` ընդդեմ Ռ. Քոչարյանի:
Մելիքյանը նկատեց, որ այսօր ավելի հստակ է իր այդ պնդումը, և հենց Սերժ Սարգսյանի որոշմանն է թողնված, թե արդյոք երկխոսություն կլինի՞, թե` ոչ, և թե Ռոբերտ Քոչարյանին կաջակցի՞, թե` ոչ:
Բանախոսը նկատեց, որ այս երկընտրանքից ազատվելու համար անհրաժեշտ է նոր օրակարգի ձևավորում, և այդ օրակարգում պետք է հայտնվեն այնպիսի հարցեր, որոնք հնարավորություն կտան, որ գալիք ընտրությունները լինեն թափանցիկ, որ ընտրության մասնակիցներից և ոչ մեկը ընտրությունների արդյունքն անվավեր չճանաչի:
«Եթե մենք ունենանք արտահերթ ընտրություններ, և երկխոսության հիմնական թեման էլ դա լինի, ապա մենք կունենանք կեղծված ընտրություններ»,- մանրամասնեց Մելիքյանը:
Նա նաև շեշտեց, որ չի կարելի թերագնահատել Լևոն Տեր-Պետրոսյանի ներդրումը հայաստանյան քաղաքական դաշտում: Ըստ Մելիքյանի` եթե 2007-ին Տեր-Պետրոսյանը չվերադառնար քաղաքականություն, հայ հասարակությունը չէր կարողանա նման լուրջ ընդվզման գործողություններ ցուցաբերել` ընդդեմ իշխանությունների. «Շատ լավ է, որ նա իր կողմնակիցմների հետ կարողացավ պահել այդ հասարակական լարումը և իշխանություններին ստիպեց սթափվել ու գնալ փոփոխությունների:Այլ հարց է, որ ՀԱԿ-ն այսօր իր քաղաքական ակտիվության բարձրակետն անցել , և չեմ ակնկալում, որ ՀԱԿ-ը կունենա նոր թարմ ուժեր և ակտիվություն»:
Արման Մելիքյանի կարծիքով` ՀԱԿ-ի ֆենոմենը հիմնականում կապված է Տեր-Պետրոսյանի անձի հետ, մյուս կողմից` այդ ռեսուրսը սահմանափակ է, քանզի Տեր-Պետրոսյանը չդարձավ համաժողովրդական համախմբման մեխանիզմ. ««Թաթար-մոնղոլական» որակումը պառակտիչ դեր կատարեց, որովհետև այդպես անվանվեց ոչ միայն գործող իշխանությունը, այլ Ղարաբաղի ներկայացուցիչները: Սա նշանակում է, որ համախմբող դեր չի կատարելու Տեր-Պետրոսյանը, քանզի հանրապետության բնակչության մեծ մասը ղարաբաղցիներ են, ավելին` սրանից վերանալով էլ, կան մարդիկ, ուժեր, որոնք երբեք չեն միանա ՀԱԿ-ին: Շատ մարդիկ, ովքեր հեռացել են ՀԱԿ-ից` նրա համար կարևոր դերակատարություն ունեին, և պարզ է, որ նրանց հեռացումով ՀԱԿ-ը թուլանում է»:
Այուամենայնիվ, ըստ Մելիքյանի, ՀԱԿ-ից անջատված ուժերն էլ ակտիվություն դրսևորելու հնարավորություն չունեն, և նրանցից ոչ մեկը չի կարող ձևավորել ծանրակշիռ միավոր, քանզի, անկախ պատճառներից, նրանց հեռացումը կարող է դիտարկվել որպես դավաճանություն: Նկատի ունենալով նորաստեղծ «Ազատ Դեմոկրատներ» կուսակցությանը` Մելիքյանը նկատեց, որ նրանք չեն ունենա այնքան համակիր, որքան ունի Տեր-Պետոսյանը:
Հարցին, թե հնարավո՞ր է ՀԱԿ-ի շուրջօրյա հանրահավաքները հանգեցնեն հերթական բախման և Մարտի 1-ի կրկնման, Մելիքյանը պատասխանեց. «Այսօր ո՛չ իշխանություններին, ո՛չ ՀԱԿ-ին ձեռնտու չէ որևէ բախում, դա ցանկալի շարունակություն չի լինի այսօրվա միտինգի համար: Այսօր այդ ռեսուրսը չկա, իշխանությունը գիտակցում է, որ ՀԱԿ-ն այսօր ի վիճակի չէ գնալ վճռական գործողությունների, և պարզ է` բախումների չի գնա: Ես կարծում եմ, այս հանրահավաքները իրական, շոշափելի որևէ արդյունք չեն տա, ՀԱԿ-ը պետքէ շարունակի երկխոսությունը»: