Դրամի մեծ արժեզրկում դեռ չի սպասվում, այդ 370-380 դրամ միջակայքը նույն ձևով պահպանվելու է: «Առաջին լրատվականի» հետ զրույցում նման կարծիք հայտնեց ֆինանսիստ Էմիլ Սողոմոնյանը:
«Դեֆոլտ Հայաստանին չի սպասվում, և չլինող բանի համար չարժե խոսել: Փոխարժեքի տատանումը չի կարելի կապել դեֆոլտի հետ: Փոխարժեքով դեֆոլտ լինել-չլինել չի կարող: Բացի դրանից, դեֆոլտի համար գոյություն ունի արտաքին պարտք, գոյություն ունի ներքին պարտք»,- ասաց Է.Սողոմոնյանը:
Նա բացառեց, որ Հայաստանում կարող է դրամի փոխարժեքի մեծ անկում լինել: Մասնագետի խոսքով՝ դոլար-դրամ տատանումները կապված են շուկայում առաջարկի ու պահանջարկի հետ. եթե բորսայում առաջարկը մի քիչ շատ է լինում՝ արժեքն ընկնում է, պահանջարկ է առաջանում գնելու՝ թանկանում է: «Եվ այդ ինտերվալը՝ 370-380, շատ նորմալ է: Այն ժամանակ, որ ֆիքսված էր, ասում էինք պետությունը պահում է զոռով, հիմա բաց, լողացող կուրսով է, էլի դժգոհում ենք, ասում ենք՝ ինչո՞ւ է: Պետք է դա լինի: Ես համոզված եմ՝ Կենտրոնական բանկը միջամտում է այն դեպքում, երբ մեծ տատանումներ է նկատում շուկայում, եթե ոչ՝ ընդհանրապես ինքը չի խառնվում:
Վերջերս շուկայում կատարվող 2-3 դրամի փոփոխությունը, կամ դրամի փոխարժեքը դոլարի համեմատ հասավ 378-ի ու նորից ետ եկավ, դրանք սովորական պահանջարկի ու առաջարկի արդյունք են»,- նշեց Է.Սողոմոնյանը:
