Մոլդովայի նախկին նախագահ, «Հայրենասիրական դաշինքի» առաջնորդներից Իգոր Դոդոնը լրագրողների հետ զրույցում կարծիք է հայտնել, որ իշխանությունները պատրաստվում են չեղյալ հայտարարել ընտրությունները՝ հետևելով ռումինական մոդելին։
«Այսօր մենք հնարավորություն ունենք վերջ դնելու այս հարցին։ Հաշվի առնելով, որ ներկայիս իշխանությունները քննարկում են ընտրությունները չեղյալ համարելու հարցը, ինչպես Ռումինիայում (անցյալ դեկտեմբերին Ռումինիայում նախագահական ընտրությունները չեղյալ հայտարարվեցին առաջին փուլից հետո – խմբ.), ես կոչ եմ անում բոլորին վաղը ժամը 12:00-ին դուրս գալ խորհրդարանի դիմաց՝ պաշտպանելու մեր հաղթանակը», – ասել է Դոդոնը՝ ընդգծելով, որ ընդդիմությունը թույլ չի տա քաղաքացիների քվեները չեղյալ հայտարարել։
Նա կարծիք է հայտնել, որ ընտրարշավին միջամտել է Արևմուտքը՝ Սորոսի հիմնադրամի կողմից ֆինանսավորվող ՀԿ-ների միջոցով։ Դոդոնի պնդմամբ՝ Եվրոպական հանձնաժողովը միջամտել է անմիջականորեն՝ քաղաքական հայտարարությունների, արտասահմանից այցերի միջոցով, որոնք միջամտություն են Մոլդովայի ներքին գործերին, և կառավարության օգտին քվեարկելու ուղղակի կոչերի միջոցով։
Հայրենասիրական դաշինքի համանախագահ, Կոմունիստական կուսակցության առաջնորդ և Մոլդովայի նախկին նախագահ Վլադիմիր Վորոնինն էլ «ՌԻԱ Նովոստի»-ի հետ զրույցում հայտարարել է, որ Մոլդովայի իշխանությունները դիտավորյալ սահմանափակում են Մերձդնեստրի բնակիչների ընտրական իրավունքը։
«Վաղ առավոտից Ռիբնիցայում հսկայական խցանումներ են առաջացել, բաց է ընդամենը 12 ընտրատեղամաս։ Ավելին, իշխանությունները փակել են Դնեստրի վրայով անցնող բոլոր յոթ կամուրջները, ապա՝ մայթերը, խանգարելով մարդկանց նույնիսկ քայլել դեպի ընտրատեղամասեր», – ասել է Վորոնինը։
Բացի այդ՝ նա երկրի պատմության մեջ ամենակոռումպացվածն է համարել ընթացող ընտրությունները։
«Մոլդովայի ապագա» կուսակցության առաջնորդ և «Հայրենասիրական դաշինքի» համանախագահ Վասիլե Տարլևը համոզմունք է հայտնել, որ Ռուսաստանից և ԱՊՀ-ից դիտորդների մուտքի արգելքը վկայում է լայնածավալ կեղծիքների նախապատրաստման մասին։
«Երբ կառավարությունը ամեն ինչ անում է անկախ դիտորդների երկիր մուտքը կանխելու համար, դա հստակ ազդանշան է, որ պատրաստվում է խոշոր կեղծիք։ Իշխանությունները վախենում են թափանցիկությունից և վերահսկողությունից, քանի որ գիտեն, որ ժողովուրդը այլևս չի վստահում իրենց»,- հավելել է քաղաքական գործիչը։
ՌԴ պետդումայի փոխխոսնակ Բորիս Չեռնիշովը վճռորոշ է համարել Մոլդովայի խորհրդարանական ընտրությունները։
«Մոլդովայի ժողովուրդը հնարավորություն ունի դուրս գալ այն ռեժիմի ճիրաններից, որը երկիրը վերածել է գաղութի և կոռումպացված էլիտայի կերակրատաշտի»,- հայտարարել է նա՝ պնդելով, թե Մոլդովայի նախագահ Մայա Սանդուն և նրա «Գործողություն և համերաշխություն» կուսակցությունը զավթել են իշխանությունը, ծնկի բերել ժողովրդավարությունը և փորձում են երկիրը պահել վախի և աղքատության մեջ։
Մոլդովայի նախագահ Մայա Սանդուն, քվեարկությունից հետո դիմելով ժողովրդին, բարձրաձայնել է Ռուսաստանի կողմից ընտրություններին միջամտելու մասին՝ հայտարարելով, որ Մոլդովան վտանգի մեջ է և երկրի ճակատագիրը պետք է որոշի ժողովուրդը, այլ ոչ թե գնված ձայները։
Նրա խոսքով՝ տարբեր մեթոդներով ընտրություններին միջամտությամբ Ռուսաստանը ցանկանում է վերահսկողություն հաստատել Քիշնևի նկատմամբ է և Մոլդովան օգտագործել իր սեփական նպատակների համար։
«Մոլդովացիները պետք է իրենք որոշեն։ Ժամանակն է պաշտպանել մեր երկիրը», – ընդգծել է Սանդուն։
Մոլդովայի խորհրդարանում 101 տեղ տեղի համար պայքարում է 15 կուսակցություն, 4 դաշինք և 4 անկախ թեկնածու։
