Սաուդյան Արաբիայի արևելքում երեկ տեղի են ունեցել բախումներ ոստիկանության և բողոքի ցույցի մասնակիցների միջև: Տուժել է մոտ 40 մարդ: Ցուցարարները հիմնականում շիա մուսուլմաններ են: Իրանական Press TV-ն հաղորդում է, որ դեպքերը տեղի են ունեցել Ալ-Քաթիֆ քաղաքում: Հիմնական առիթը, որը ստիպել էր տասնյակ մարդկանց դուրս գալ փողոց, Ալ-Ավամի քաղաքում տեղի ունեցած բողոքի ակցիայի ճնշումն էր:
Ալ-Քաթիֆ քաղաքը գտնվում է ոստիկանության շրջափակման մեջ: Ցուցարարներն իրենց գործողությունները ապստամբություն են որակում: Ոստիկանությունը հաղորդում է 14 տուժածի մասին, ընդ որում՝ դրանցից 11-ը ոստիկաններ են: Հայտարարության մեջ ասվում է, որ կատարվող իրադարձությունները տեղի են ունենում արտաքին ուժերի կամքով, սակայն չի նշվում, թե կոնկրետ որ երկրների: Արաբական հեղափոխությունների ընթացքում Սաուդյան Արաբիայում նույնպես եղան բողոքի ակցիաներ, սակայն դրանք չվերածվեցին բողոքի զանգվածային ցույցերի:
