«Ճարտարապետների միջազգային միությունը ստեղծվել է 1970-ականներին, իսկ 1985 թ. տեղի ունեցած կոնգրեսում որոշվեց հոկտեմբերի առաջին երկու օրը նշել որպես ճարտարապետների օր: Այն ընդգրկում է 110 երկրների ճարտարարպետների միություններ»,- այսօր ճարտարապետների օրվա առիթով հրավիրված ասուլիսում հայտնեց Ճարտարապետների միության նախագահ Մկրտիչ Մինասյանը:
Նրա խոսքով` իրենք մշակում են օրենքներ, որոնք կապահովեն ճարտարապետների մասնակցությունը երկրի քաղաքաշինության համար կարևոր հարցերին:
Ճարտարապետ Սաշուր Քալաշյանն էլ ավելացրրեց, որ, հաշվի առնելով երկրի տնտեսական ու քաղաքական վիճակը, դրա ժամանակը չէր, իսկ հիմա ժամանակն է, որ շրջվենք հետ ու տեսնենք, թե ինչ ենք կորցրել ու ինչ ունենք: Այս նպատակով ճարտարապետները ուսումնասիրել են Ֆրանսիայի, ԱՄՆ-ի, Ռուսաստանի օրենսդրական դաշտը ու մշակել են «Ճարտարապետական մասնագիտական գործունեության մասին» օրենքի նախագիծ:
Քալաշյանի խոսքով` պետք է ստեղծել մի վիճակ, որ թելադրողը լինի օրենքը: «Կապրիզ կամ նկարչություն չէ քաղաքաշինությունը, և դա վերաբերում է մեզ բոլորիս»,- ասաց նա` ընդգծելով, որ եթե ազատություն տանք, ապա ամեն մեկն իր ուզածով կտնօրինի ազատ տարածքը:
«Օրենքը մշակված է ու հանձնված է քաղաքշինության նախարարություն, արված են շտկումներ: Ձգձգվում է օրենքի ընդունումը: Օրենքը կստեղծի կարգ ու կանոն: Անհնար է այս վիճակում ճիշտ գործել»,- ասաց Մկրտիչ Մինասյանը՝ հույս հայտնելով, որ օրենքը այս տարի կքննարկվի Աժ-ում:
Ս.Քալաշյանն էլ ասաց, որ այսօր այնպիսի վիճակ է, որ եթե մեկն ուզենա իմանալ` այսօր ինչ է կառուցվում, անհնար է: Չկա այդպիսի փաստաթուղթ:
