Грузия Online-ի փոխանցմամբ` նոյեմբերի 13-ին Հարավային Օսիայում կայանալիք նախագահական ընտրությունների նախաշեմին, Հարավային Օսիան հայտնվել է սկանդալային իրավիճակում` սահմանափակելով օտարազգիների, այդ թվում՝ նաև Ռուսաստանի քաղաքացիների մուտքը: Սակայն այս որոշումը չի տարածվել Հարավային Օսիայում գտնվող ռուսական ռազմաբազայի և ռուսական այլ ուժային կառույցների ներկայացուցիչների ու նրանց ընտանիքների վրա:
Այս ամենը տեղի ունեցավ այն բանից հետո, երբ սեպտեմբերի 30-ին Հարավային Օսիայի Կենտրոնական ընտրական հանձանաժողովը (ԿԸՀ) մերժեց առաջիկա նախագահական ընտրությունների համար գրանցել Ռուսաստանի ազատ ոճի ըմբշամարտի գլխավոր մարզիչ Ջամբոլատ Թեդեևի թեկնածությունը, որի կողմնակիցները փորձել էին ներխուժել կառավարության շենք, ուր տեղակայված է ԿԸՀ-ն:
Կովկասի հարցերով վրացի փորձագետ Մամուկա Արեշիձեն ПирWели գործակալությանը տված հարցազրույցի ժամանակ «ծիծաղելի» է որակել Հարավային Օսիայի իշխանությունների կողմից ռուս-վրացական սահմանի փակումը.
«Այդ որոշումն ուղղված է Կոկոյտիի ընդդիմադիր իշխանության դեմ: Կոկոյտիի իշխանությունը զգում է, որ գտնվում է լուրջ վտանգի տակ: Նա հասկանում է, որ Ձամբոլատ Թեդեևի ֆիգուրը բավական լուրջ է ռուսների շրջանում: Երեկ Ցխինվալն արգելել էր նաև «Եդինայա Ռոսիա»-ի դաղստանյան մասնաճյուղի հումանիտար բեռը:
Սահմանը փակվել է նրա համար, որպեսզի ընդդիմության աջակիցները չկարողանան Ռուսաստանից ժամանել և աջակցել ընդդիմությանը: Ռուսաստանի հետ սահմանի փակումն ավելի ծիծաղելի է թվում դե ֆակտո իշխանությունների կողմից մնացյալ Վրաստանի հետ հարաբերությունների մեղմացման վերաբերյալ արած հայտարարության ֆոնին:
Ինչ վերաբերում է նրան, թե ինչպես դրան կվերաբերի Կրեմլը, կամ թե որքանով է այդ որոշումը համաձայնեցված Մոսկվայի հետ, ապա Կրեմլի դիրքորոշումը դեռևս բացահայտված չէ: Մենք ստույգ տեղեկություն չունենք այդ մասին: Մենք տեղի ունեցածից միայն կարող ենք եզրակացնել, որ Հարավային Օսիայի վերաբերյալ Կրեմլում ինչ-որ բան է տեղի ունենում: Մոսկվայի դիրքորոշումը հայտնի կդառնա միայն այն ժամանակ, երբ այդ ներքին պայքարում (եթե դա իսկապես լինի) մեկնումեկը հաղթի»:
