News Georgia-ի փոխանցմամբ՝ Վրաստանի նախագահի մամլո խոսնակ Մանանա Մանջգալաձեն այսօր կայացած ճեպազրույցի ժամանակ անդրադարձել է Ֆրանսիայի նախագահ Նիկոլա Սարկոզիի ուրբաթօրյա այցին.
«Սարկոզին Թբիլիսիի կենտրոնում հրապարակավ ելույթ է ունենալու։ Ազատության հրապարակում ելույթ ունենալը եղել է Սարկոզիի ցանկությունը։ Հոկտեմբերի 7-ին Ազատության հրապարակում հավաքվածներն անձամբ կհամոզվեն դրանում։ Այդպիսի որոշումները մշտապես ընդունվում են երկկողմանի համաձայնագրերի հիման վրա։
Սարկոզիի պաշտոնական այցի նպատակն այն հատուկ աջակցության հաստատումն է, որը Ֆրանսիան և ընդհանրապես ԵՄ-ը ցուցաբերում են Վրաստանի նկատմամբ։ Սարկոզիի այցը վճռորոշ է լինելու ԵՄ-ի հետ Վրաստանի փոխհարաբերությունների ճանապարհին։
Վրացական այցի շրջանակներում տեղի է ունենալու Սարկոզի-Սաակաշվիլի դռնփակ հանդիպումը։ Դրանում քննարկվելու են վրաց-ֆրանսիական հարաբերությունները, Վրաստանի և ԵՄ-ի հարաբերությունները, ինչպես նաև Ռուսաստանի թեման։
Սարկոզին այն մարդն է, որը 2008 թվականին ակտիվորեն ներգրավվել է 6 կետից բաղկացած համաձայնագրի կնքման գործընթացում, ինչը վճռորոշ դարձավ։ Սարկոզին այն մարդն է, որը երկրի համար ամենածանր ու բարդ ժամանակաշրջանում՝ 2008 թվականի օգոստոսյան պատերազմի ժամանակ, եղել է Վրաստանի ու վրաց ժողովրդի կողքին»։