Թուրքական Internetajans.com կայքի փոխանցմամբ՝ Թուրքիայի ազգային կրթության նախարարության թույլտվությամբ, «Գյուրբուզ» հրատարակչությունը տպագրել է այդ երկրի ֆիզիկական քարտեզը։ 2011/12 կրթական տարում տարրական և միջնակարգ դպրոցների համար նախատեսված այդ քարտեզում Արարատ լեռը (թուրքական տարբերակով՝ Աղրը դաղ) ներառվել է Հայաստանի սահմաններում, ինչն առաջացրել է թուրք հասարակության խոր դժգոհությունը։
Այս խնդրին իր հոդվածում անդրադարձել է Ֆահրեթթին Օզթոփրաքը, որը ուշադրություն է հրավիրում այն փաստի վրա, որ Արարատ լեռը և Աղրը նահանգն ամբողջությամբ գտնվում են Թուրքիայի սահմաններում, և լեռան անգամ մեկ թիզ հողը չի գտնվում Հայաստանի տարածքում։
Այս կապակցությամբ նա հարց է բարձրացնում. «Եթե սա հայրենիքի և պետության հանդեպ դավաճանություն չէ, ապա ի՞նչ է։ Արդյո՞ք սա 1920 թվականին կնքված Ալեքսանդրապոլի պայմանագիրն աղբաման նետելու փորձ չէ։ Այս ամենի մեղավորը Թուրքիայի ազգային կրթության նախարարությունն է, պետք է վերջ դնել այս դավաճանությանը»:
