Ադրբեջանական APA լրատվական գործակալության փոխանցմամբ՝ պլանավորված է, որ հաջորդ շաբաթ Ադրբեջան է այցելելու Թուրքիայի ազգային պաշտպանության նախարարության պատվիրակությունը։ Այն գլխավորելու է պաշտպանության նախարար Իսմեթ Յըլմազը։
Թուրքական ռազմական աղբյուրների հաղորդմամբ՝ թուրքական պատվիրակությունը Բաքու է ժամանելու հոկտեմբերի 12-ին։ Պլանավորված է, որ Իսմեթ Յըլմազն Ադրբեջանում հանդիպումներ է ունենալու իր ադրբեջանցի գործընկեր Սաֆար Աբիևի, ռազմական արդյունաբերության նախարար Յավեր Ջամալովի, պետական սահմանապահ ծառայության պետ Էլչին Գուլիևի, ինչպես նաև այլ ուժային կառույցների ղեկավարների հետ։
Այդ հանդիպումներում կողմերը քննարկելու են ռազմական և ռազմա-տեխնիկական ոլորտներում երկու երկրների համագործակցության և դրա ընդլայնման հարցը։ Բացի այդ, քննարկվելու է նաև Թուրքիայի ռազմական արդյունաբերության ոլորտում իրականացվող մեծ նախագծերում ադրբեջանական կողմի ներգրավվածության հարցը։
