Մյասնիկյան պողոտայում վնասազերծված զինված բանդայի (որը հարձակումներ էր կատարել նախկին և ներկա պաշտոնյաների բնակարաններ վրա և գողություններ կատարել) պարագլուխ Արտուշ Հակոբյանը նախկինում 6 անգամ դատապարտված է եղել, մի քանի անգամ ազդեցիկ միջնորդությունների շնորհիվ կարողացել է ազատվել քրեական պատասխանատվությունից: Ստորև ներկայացնում ենք նրա և համախոհների կենսագրական որոշ տվյալներ:
Արտուշ Հակոբյան (ծնվ.1961թ., Կոտայքի մարզի Գառնի գյուղում)
1987թ.-ին պետական ունեցվածքի առանձնապես խոշոր չափի հափշտակության և ՀՀ Գերագույն դատարանի դատական կոլեգիայի 1987թ. վճռով դատապարտվել 13 տարի ազատազրկման… 3 տարի անց` 1990թ. կալանավայրից դիմել է փախուստի: Նույն թվականի մայիսի 30-ին, Գառնի գյուղի մոտ ոստիկանների կողմից ձերբակալման ժամանակ իր մոտ եղած ատրճանակից կրակել է նրանց ուղղությամբ, վիրավորվել ոստիկանների պատասխան կրակոցից և ձերբակալվել… Հարուցվել է քրգործ և ՀՀ Գերագույն դատարանի կոլեգիայի որոշմամբ դատապարտվել 12 տարի ազատազրկման… Սակայն 1992թ. սեպտեմբերին կրկին փախուստի է դիմել կալանավայրից…
1996թ.-ի հունվարի 12-ին Ա.Հակոբյանի նկատմամբ հարուցվել է քրգործ` այս անգամ` զենք զինամթերք, թմրամիջոցներ ապօրինի պահելու համար, ու թեև Հակոբյանը կալանավորվել է և գործն ուղարկվել դատարան, մեկ տարի անց` 1997թ-ին, ժողդատարանի որոշմամբ` Արտուշ Հակոբյանը ընդունվել է հարկադրական բուժման` ուժեղացված հսկողության հոգեբուժական բաժանմունք… 1998թ. փետրվարին բժշկական բնույթի հարկադրական միջոցների վերանայման հանձնաժողովը եզրակացրել է, որ Ա. Հակոբյանը շրջապատի համար սոցիալական վտանգ չի ներկայացնում, և նա տեղափոխվել է սովորական հսկողության բաժանմունք, որտեղից փախուստ կատարել:
Ազատության մեջ Ա.Հակոբյանը, ՀՀ բանկերի ասոցացիայի նախագահ Բագրատ Ասատրյանից առանձնապես խոշոր չափերի գումար շորթելու դիտավորությամբ, հանցավոր համաձայնության գալով նույն հիվանդանոցի հարկադիր բուժման մեջ գտնվող Ա. Նազարյանի և գործով չպարզված 2 այլ անձանց հետ, 1998 թ. Պուշկինի փողոցից հրազենի գործադրման սպառնալիքով և բռնությամբ առևանգելով Բագրատ Ասատրյանին` տեղափոխել են Գառնի գյուղի մոտակայքում գտնվող խորտկարան, որտեղ զրկելով ազատությունից, սպանության սպառնալիքներով ու բռնությամբ, պահանջել են առանձնապես խոշոր չափերի` 100.000 ԱՄՆ դոլար գումար:
Կատարած հանցանքի համար Հակոբյանին մեղադրանք է առաջադրվել անձի առևանգման, ավազակային հարձակման, առանձնապես խոշոր չափերի շորթման և զենք-զինամթերքի ապօրինի պահման համար: Նա կրկին կալանավորվել է, սակայն կրկին տեղավորվելով հոգեբուժական հիվանդանոցում` 2001թ. օգոստոսի 22-ի լույս 23-ի գիշերը կրկին դիմել է փախուստի: Ա. Հակոբյանի նկատմամբ հայտարարվել է հետախուզում և դատարանի կողմից որպես խափանման միջոց ընտրվել է կալանքը:
Դավիթ Գալստյան (ծնվ.1980 թ.)
Այս երիտասարդը 04.02.1998 թ.-ին իր քրեական կենսագրությունը սկսել է դիտավորությամբ ծանր մարմնական վնասվածք հասցնելու դեպքով, դատապարտվել 3 տարի ազատազրկման, և պատժի կրումից ազատվել է պայմանական վաղակետ…
2001 թ-ի հուլիսի 30-ին դատապարտվել է ազատազրկման 2 տարի 6 ամիս ժամկետով` կրկին անգամ կամ մի խումբ անձանց կողմից նախապես համաձայնության գալով, շինություն, պահեստարան կամ բնակարան մուտք գործելով կատարած գույքի հափշտակության համար, սակայն պատժի կրումից կրկին ազատվել է պայմանական վաղակետ…
16.09.2004 թ. ՀՀ քր. օր.-ի 177 հոդվածի 3-րդ մասի 1-ին և 3-րդ կետերի մեղադրանքով (գողություն, որը կատարվել է առանձնապես խոշոր չափերով և նույն օրենսգրքի 175-182-րդ, 222-րդ, 234-րդ, 238-րդ, 269-րդ հոդվածներով նախատեսված հանցանքների համար երկու կամ ավելի դատվածություն ունեցող անձի կողմից գողություն կատարելը) դատապարտվել է 2 տարի ազատազրկման… Մինչդեռ այս հոդվածը նախատեսում է 4-8 տարի ազատազրկում` գույքի բռնագրավմամբ, կամ առանց:
10.06.2008 թ. ՀՀ քրեական օրենսգրքի 177 հոդվածի 3-րդ մասի 3-րդ կետի հատկանիշներով` գողություն, հարուցվել է քրգործ… 03.02.2009 թ. ՀՀ քր. օրի 177 հոդվածի 3-րդ մասի 1-ին և 3-րդ կետերի` գողության, գողության փորձի, ապօրինի կերպով հրազեն, պայթուցիկ նյութեր կամ պայթուցիկ սարքեր ձեռք բերելու, պահելու, կամ կրելու մեղադրանքով դատապարտվել է 6 տարի 6 ամիս ժամանակով ազատազրկման… Հետագայում նշանակվել է հարկադիր բուժում…
Սամվել Դավթյան (ծնվ.1968 թ.,)
09.04.1994 թ-ին բանդիտիզմի մեղադրանքով դատապարտվել է ազատազրկման 11 տարի 6 ամիս ժամանակով, որը մեղմացվել է 9 տարի 6 ամսի…
2000 թ-ի մայիսի 15-ին ուղղիչ աշխատանքային հիմնարկի ադմինիստրացիայի պահանջներին չարամտորեն չհնազանդվելու համար դատապարտվել է 6 տարի 6 ամիս ազատազրկման… 7 տարի անց` 2007 թ-ի մայիսին քր. օրի 131 հոդվածի 2-րդ մասի 1-ին, 7-րդ և 8-րդ կետերի (մարդուն առևանգելը, որը կատարվել է մի խումբ անձանց կողմից նախնական համաձայնությամբ, շահադիտական դրդումներով, նախկինում մարդուն առևանգելու համար դատապարտված անձի կողմից) մեղադրանքով դատապարտվել է ազատազրկման 4 տարի ժամանակով… 11.01.2011 թ. ազատվել է քրեակատարողական հիմնարկից:
Գուրգեն Հայրապետյան (ծնվ.1962 թ.,)
1986 թ-ին գողության մեղադրանքով դատապարտվել է ազատազրկման 2 տարի ժամանակով` պատժի պայմանական հետաձգումով…
1985 թ-ին ավազակության միջոցով կատարված գույքի հափշտակության և ավազակության համար դատապարտվել է 9 տարվա ազատազրկման… ՌԴ ՍանկտՊետերբուրգ քաղաքում 25.05.1994 թ. ՌԴ քրեական օրենսգրքի 148 հոդվածի 3-րդ մասի մեղադրանքով դատապարտվել է ազատազրկման` 6 տարի 2 ամիս ժամանակով… Պատժի կրումից ազատվել է 1999 թ. համաներման հրամանով…
2005 թ-ի սեպտեմբերին բանդիտիզմի, ապօրինի կերպով հրազեն, ռազմամթերք, պայթուցիկ նյութեր կամ պայթուցիկ սարքեր ձեռք բերելու, պահելու կամ կրելու, իշխանության ներկայացուցչի նկատմամբ բռնություն գործադրելու համար դատապարտվել է 12 տարվա ազատազրկման, սակայն պատիժը մեղմացվել է 5 տարի 11 ամսվա… 23.03.2010 թ. ազատվել է պատժի կրումից…
Արթուր Մանուկյան (ծնվ. 03.03.1989 թ.)
2009 թ-ի հունիսին կալանավորվել է ավազակության (որը կատարվել է խոշոր չափերով գույք հափշտակելու նպատակով և զենքի կամ որպես զենք օգտագործվող այլ առարկաների գործադրմամբ) մեղադրանքով, սակայն դատապարտվել է այլ` 183 հոդվածի 3-րդ մասի 3 կետով (ավտոմեքենային կամ տրանսպորտային այլ միջոցին ապօրինաբար տիրանալն առանց հափշտակելու նպատակի, որը կատարվել է կյանքի կամ առղջության համար վտանգավոր բռնություն գործադրելով կամ դա գործադրելու սպառնալիքով) և ուղարկվել հարկադիր բուժման…
Քյարամ Ամոյան (ծնվ. 22.06.1992 թ.)
2008 թ-ին. կողոպուտի (որը կատարվել է մի խումբ անձանց կողմից նախնական համաձայնությամբ, կատարվել է խոշոր չափերով, կատարվել է բնակարան, պահեստարան կամ շինություն ապօրինի մուտք գործելով) մեղադրանքով դատապարտվել է ազատազրկման 2 տարի 10 ամիս ժամանակով…
