Ամերիկյան զենքն Ուկրաինային կմատակարարվի ՆԱՏՕ-ի երկրների միջոցով, ինչը դաշինքի գլխավոր քարտուղարն արդար է համարում։ ՆԱՏՕ-ի գլխավոր քարտուղար Մարկ Ռյուտեն թեման քննարկել է Fox News-ին տված հարցազրույցում։
Լրագրողը հարց է ուղղել Ռյուտեին, թե ինչու ԱՄՆ-ն զենքը Կիևին չի տալիս ուղղակիորեն, այլ դա անում է եվրոպական երկրների և ՆԱՏՕ-ի միջոցով։
«Կա երկու պատճառ։ Առաջինը լոգիստիկան է, իսկ ՆԱՏՕ-ն լոգիստիկայից լավ է ։ Զենքը Ուկրաինային կմատակարարվի այնպես, որ դրանք հնարավոր լինի լավագույնս օգտագործել։ Ամեն ինչ փաթեթավորված է հավաքածուներում շատ հարմար՝ առավելագույն արդյունավետության հասնելու համար», – ասել է Ռյուտեն։
Նա հավելել է, որ երկրորդ պատճառը ֆինանսավորումն է։
«Նախագահն ինձ ասաց. «Մարկ, մենք ուզում ենք այս զենքը տալ Ուկրաինային, որպեսզի նրանք կարողանան պաշտպանվել Ռուսաստանից։ Բայց դուք՝ եվրոպացիներդ, պետք է վճարեք դրա համար»։ Կարծում եմ՝ դա արդար է», – ասել է դաշինքի գլխավոր քարտուղարը՝ հավելելով, որ եվրոպացիները պատասխանատվություն են ստանձնում և վճարում այդ զենքերի համար։
