ԱՄՆ նախագահ Դոնալդ Թրամփն այսօր կհայտարարի Ուկրաինային զինելու նոր ծրագրի մասին, որը, ակնկալվում է, կներառի հարձակողական զենքեր, հայտնում են Axios-ի աղբյուրները։
Պորտալը գրում է, որ հարձակողական զենքերի մատակարարումը կլինի Թրամփի քաղաքականության կտրուկ փոփոխություն, քանի որ մինչ վերջերս նա ընդգծում էր, որ կտրամադրի միայն պաշտպանական զենքեր՝ հակամարտության սրումից խուսափելու համար:
Թրամփը հայտարարությունը կանի Սպիտակ տանը՝ ՆԱՏՕ-ի գլխավոր քարտուղար Մարկ Ռյութեի հետ հանդիպման ժամանակ, «կներկայացնի Ուկրաինային զինելու նոր ծրագիր»։
Պորտալի աղբյուրները պնդում են, որ Թրամփի ծրագիրը կարող է ներառել Ուկրաինային «հեռահար հրթիռների» փոխանցման կետ, որոնք կարող են խոցել թիրախներ Ռուսաստանի տարածքի խորքում, ներառյալ Մոսկվան: Սակայն Axios-ի աղբյուրները նշում են, որ իրենց հայտնի չէ՝ արդյոք այդ մասին վերջնական որոշում կայացվել է, թե ոչ:
Կիրակի օրը Վաշինգտոնի մոտ գտնվող Էնդրյուսի ռազմաբազայում լրագրողների հետ զրույցում Թրամփը հայտարարել է, որ ԱՄՆ-ն Ուկրաինային կտրամադրի լրացուցիչ սպառազինություն, ներառյալ Patriot համակարգերի համար նախատեսված հրթիռներ, որոնք կֆինանսավորի Եվրամիությունը:
