News Georgia-ի փոխանցմամբ՝ Վրաստանի ԱԳՆ-ը մեծ նշանակություն է տալիս Ֆրանսիայի նախագահ Նիկոլա Սարկոզիի առաջիկա վրացական այցին, որի շրջանակներում պլանավորված է երկու երկրների ղեկավարների հանդիպումը և Թբիլիսիի կենտրոնում Սարկոզիի հրապարակային ելույթը։ Այս մասին ավանդական ճեպազրույցի ժամանակ հայտարարել է Վրաստանի փոխարտգործնախարար Դավիթ Ջալագանիան։
Վերջինս նշել է. «Սարկոզին Վրաստան կժամանի հոկտեմբերի 7-ի երկրորդ կեսին։ Սարկոզիի նման համաշխարհային առաջնորդի այցը մեծ կարևորություն է ներկայացնում Վրաստանի համար։ Բոլորին հայտնի է նրա դերը, անձնական քաջությունն ու նպատակամղվածությունը, որոնք նա ցուցաբերել է ռուսական ագրեսիայի դեմ, և որոնք վճռորոշ դեր են խաղացել 2008 թվականի օգոստոսին տեղի ունեցած ռուս-վրացական պատերազմի հրադադարի կնքման ժամանակ։
Նախագահ Սաակաշվիլիի հետ հանդիպման ժամանակ քննարկվելու են Վրաստանի ու Ֆրանսիայի երկկողմ ու բազմակողմ հարաբերությունների բոլոր ասպեկտները։ Սարկոզին Վրաստանի մեծ ընկերն ու բարեկամն է։ Մենք հուսով ենք, որ նրա այցը առաջընթաց կգրանցի ոչ միայն մեր երկրների հարաբերություններում, այլև կունենա տարածաշրջանայի մակարդակի նշանակություն»։
Հիշեցնենք, որ Սարկոզին երկու անգամ Վրաստան է այցելել 2008 թվականի օգոստոսին տեղի ունեցած ռուս-վրացական հնգօրյա պատերազմից հետո՝ օգոստոսին ու սեպտեմբերին։