Ինչպես հաղորդում է France Info-ն, Ֆրանսիայի խորհրդարանի վերին պալատի` Սենատի խոսնակ է ընտրվել սոցիալիստ Ժան-Պիեռ Բելը: Բելը Ֆրանսիայի 5-րդ հանրապետության պատմության մեջ Սենատը գլխավորած առաջին սոցիալիստն է:
Ժան-Պիեռ Բելը հաղթանակ տարավ առաջին փուլում: Քվեարկության ընթացքում նրան ձայն տվեցին 179 սենատորներ՝ այն դեպքում, երբ հաղթանակի համար բավարար էր 172 ձայնը:
Ինչպես հայտնում է РИА Новости-ն, Բելի հիմնական հակառակորդի` Ժերար Լարշեի օգտնի քվեարկել է 134 սենատոր:
Հիշեցնենք, որ Ժերար Լարշեն նախկինում գլխավորել է Սենատը, եղել է իշխող «Ժողովրդական շարժման միություն» կուսակցության ներկայացուցիչ:
Սենատի ընտրությունները տեղի են ունեցել սեպտեմբերի 25-ին: Սենատում սոցիալիստներին ու նրանց կողմնակիցներին հատկացվել է 180 տեղ: Համաձայն գործող սահմանադրության` Սենատի խոսնակը երկրի նախագահի բացակայության դեպքում ստանձնում է նախագահի լիազորությունները:
Ինչպես նշում է France Info-ն, Ժան-Պիեռ Բելի ընտվելն ամրապնդում է նաև նրա դիրքերը Սոցիալիստական կուսակցության ներսում: