Հասարակական գիտակցության վրա ազդեցությունը կարող է լինել և՛ բացասական, և՛ դրական` նայած ինչպիսի արժեքներ ունի քաղաքացին, որը մասնակից կամ վկա է դառնում այդ ցույցերին: Կարևոր է նաև, թե ԶԼՄ-ներով ինչպես է լուսաբանվում այդ հանրահավաքը: Դա մեծ խնդիր է: Այսպիսի կարծիք հայտնեց ԵՊՀ սոցիոլոգիայի ամբոնի վարիչ Արթուր Աթանեսյանը` «Առաջին լրատվականի»` հասարակական գիտակցության վրա ի՞նչ ազդեցություն կգործեն երեկ ՀԱԿ-ի հայտարարած շուրջօրյա հանրահավաքները հարցին ի պատասխան:
Նրա խոսքով` հասարակական գիտակցությունն այնպիսի անկայուն երևույթ չէ, որը կարող է մեկ օրում կամ մեկ շաբաթում փոխվել, քանի որ հասուն մարդկանց մոտ ընկալումները կամ արժեքները երկար ժամանակ են ձևավորվում:
«Այն մարդկանց մոտ, ովքեր ցույց արեցին, տրամադրությունները, բնականաբար, ավելի կամրապնդվեն, իսկ մի մասը, դիտելով ցույցերը, մեկ անգամ ևս կհամոզվի, որ այդ վիճակն իրենցը չէ»,- նշեց սոցիոլոգը` ընդգծելով, որ այն մարդիկ, ովքեր գիտեն, որ այն վիճակը, որ կա Հայաստանում, իրենց համար ընդունելի, ձեռնտու կամ հաճելի չէ, կմնան այդ կարծիքին՝ անգամ եթե վիճակը փոխվի:
Նրա խոսքով` ցանկացած հասարակությունում պետք է լինեն մարդիկ, որ կամ կողմնակից կլինեն առկա վիճակին, կամ դեմ: «Դա նորմալ երևույթ է բոլոր պետություններում: Օրինակ` վերջին տարիներին Միացյալ Նահանգներում ձայները կիսվում են, և մոտավորապես 50 տոկոսը կամ մի քիչ ավել միշտ քվեարկում է նախագահի օգտին, 50 տոկոսը` ոչ: Դա նորմալ է»,- ընդգծեց նա` հավելելով, որ այնպես չի լինում, ինչպես Ռուսաստանն է պնդում, թե երկրի քաղաքացիների մեծ մասը կողմ է առկա իշխանություններին:
«Գերիշխող մեծամասնությունը երբեք միակողմանի չի ընկալում աշխարհը»,- նշեց Ա.Աթանեսյանը:
