Վերջին 10 օրը բավականին բուռն էր քաղաքական զարգացումների առումով: Նման կարծիքի է ՀՀԿ-ական պատգամավոր Գագիկ Մինասյանը: Ըստ նրա՝ Սերժ Սարգսյանի այցելութունները դրական անդրադարձ կունենան մեր երկրի համար. ԱՄՆ-ում Ս.Սարգսյանը ստացավ շքանշան, որը մինչ այդ ոչ մի այլ պետության նախագահ չէր ստացել, Գ.Մինասյանը կարևորեց ՄԱԿ-ի նստաշրջանում տեղի ունեցած ելույթը, այցելությունների տնտեսական բաղադրիչը, այցելությունը Ֆրանսիա, որի հետ ՀՀ հարաբերությունները միշտ ջերմ են, և որը պատրաստակամություն է հայտնել մասնակցել Հյուսիս-Հարավ մայրուղու, նոր ԱԷԿ-ի և դեպի Իրան երկաթուղու շինարարությանը:
Գ.Մինասյանի կարծիքով՝ կարևոր դրվագ էր նաև Վարշավա այցելությունը, որտեղ կրկին շեշտվեց, որ Ղարաբաղի հակամարտության կարգավորման խնդիրը ԵԱՀԿ մենաշնորհն է: Առաջիկա օրերին ՀՀ է ժամանելու Ֆրանսիայի նախագահը, և Սերժ Սարգսյանը մեկնելու է ՌԴ:
«Սա լուրջ հնարավորություն է ստեղծում ապագա կայուն ընթացքի համար և նախադրյալներ մեր ռազմավարական խնդիրների դրական լուծման տեսակետից»,- ասաց Գ. Մինասյանը` համաձայնելով ՀԱԿ առաջնորդ Լ. Տեր-Պետրոսյանի այն հայտարարության հետ, որ այսօր ՀՀ իշխանությունները ստանում են համաշխարհային հանրության ամենամեծ աջակցությունը. «Սա մի գնահատական է, որ ասվում է մի մարդու կողմից, ով քաջատեղյակ է, թե երբ է այդպես լինում»:
Անդրադառնալով Ռոբերտ Քոչարյանի քաղաքականություն վերադարձի խնդրին՝ Գ. Մինասյանը նշեց, որ ռուսաստանյան փոխատեղումները չեն կարող կապ ունենալ Հայաստանի ներքաղաքական գործընթացների հետ. «Ողջամիտ կլինի, եթե սպասենք, քանի դեռ ինքը որոշում չի ընդունել, և նոր քննարկենք դրանից բխող հետևանքները»:
