Սեպտեմբերի 29-30-ը Վարշավայում տեղի ունեցած «Արևելյան գործընկերության» գագաթնաժողովի արդյունքում Հայաստանի, Ադրբեջանի, Վրաստանի, Մոլդովայի և Ուկրաինայի նախագահներն ու վարչապետները և ԵՄ ներկայացուցիչներն ընդունել են համատեղ փաստաթուղթ։
Գագաթնաժողովի մասնակիցները հաստատել են 2009 թվականի մայիսին Պրահայում ընդունված սկզբունքներին իրենց հավատարմությունը՝ ընդգծելով, որ «Արևելյան գործընկերությունը» հենված է ընդհանուր արժեքների ու ազատության, ժողովրդավարութան, մարդու իրավունքների սկզբունքների ու օրենքի գերակայության վրա։ Ծրագրին մասնակցող բոլոր երկրները հավատարիմ են այդ արժեքներին։
Փաստաթղթում նշված է «Արևելյան գործընկերություն» ծրագրի հատուկ դերն այն երկրների համար, որոնք ցանկանում են առավել սերտ հարաբերություններ հաստատել ԵՄ հետ։ Բացի այդ, նշված է, որ շատ բան արդեն իսկ արված է։ Դա վերաբերում է քաղաքական ու տնտեսական բարեփոխումներին, ինչը ծրագրում ներառված երկրներին ավելի է մերձեցրել ԵՄ-ին։
Քննարկվել է նաև ազատ առևտրի գոտու ձևավորման հարցը։ Անցագրային ռեժիմի վերացման շուրջ բանակցություններ են սկսվել Ուկրաինայի ու Մոլդովայի հետ։ Բացի այդ, անցագրային ռեժիմի մեղմացման վերաբերյալ բանակցություններ են ընթանում Վրաստանի հետ։ Այդպիսի պայմանագրեր պետք է կնքվեն Հայաստանի, Ադրբեջանի ու Բելառուսի հետ։ Վարշավյան գագաթնաժողովը նաև ողջունել է Եվրանեսթի ստեղծումը։
Այս ամենի հետ մեկտեղ, նշվում է, որ դեռևս շատ անելիքներ կան։ Դա մասնավորապես վերաբերում է ծրագրում ներառված երկրներում բարեփոխումներին տեմպ հաղորդելուն, ինչը դրականորեն կազդի ԵՄ հետ նրանց հարաբերությունների վրա։
Առաջիկա անելիքների թվում անդրադարձ է կատարված նաև ծրագրում ներառված երկրների հակամարտությունների կարգավորմանը, վստահության մթնոլորտի ու բարիդրացիական հարաբերությունների ամրագրմանը, ինչը կարևոր է տարածաշրջանի տնտեսական ու սոցիալական զարգացման համար։
