Ամեն ուրբաթ Երևանի Գաֆէսճեան արվեստի կենտրոնում տեղի է ունենում «Տպագրական արվեստի ներածություն» խորագրով կրթական ծրագիրը՝ «Վիկտոր Վազարելի. Օպտիկական հեռանկարներ» ցուցադրության շրջանակում, որի ընթացքում կամավորության հիմունքներով մշակութաբանություն ուսումնասիրող երիտասարդներն իրականացնում են ծրագիրը և սովորեցնում են երիտասարդներին ժամանակակից աբստրակտ տպագրական արվեստ` մետաքսագրություն:
Ինչպես «Առաջին լրատվականին» տեղեկացրեց Գաֆէսճեան արվեստի կենտրոնի կրթական ծրագրերի համակարգող Մանե Մկրտչյանը, սա արդեն երրորդ կրթական ծրագիրն է, որին մասնակցել է շուրջ 30 երիտասարդ: « Ծրագիրը նպատակ ունի երիտասարդներին ծանոթացնել մետաքսագրության տեխնիկային, տեսնել Վիկտոր Վազարելիի ստեղծագործական շարքերը և մասնավորապես Յոհան Սեբաստիան Բախ պորտֆոլիոն, որը այցելուների համար անհասանելի է: Մետաքսագրության տեխնիկան կարող է օգտագործվել կենցաղում` վերնաշապիկների վրա հետաքրքիր պատկերներ ստանալու համար և այլն»,- նշեց Մանե Մկրտչյանը` հավելելով, որ ծրագրի մասին երիտասարդները կարող են տեղեկանալ սոցցանցերից և պաստառներից:
Տեղեկացնենք, որ երիտասարդները կրթական ծրագրին կարող են մասնակցել նախապես գրանցվելով: Անվճար կարող են տեսնել Վիկտոր Վազարելիի ստեղծագործությունները և ծանոթանալ մետաքսագրությանը:
Ծրագրի սկզբում մշակութաբանները մասնակից 10 երիտասարդներին ծանոթացրին Վիկտոր Վազարելիի արվեստին` հանգամանորեն բացատրելով նրա բոլոր աշխատանքների տեխնիկան: Տեղեկացնենք, որ սեպտեմբերի 10-ից կենտրոնի «Արծիվ» սրահում ներկայացված են Վիկտոր Վազարելիի աշխատանքները, ով 20-րդ դարի արվեստի ակնառու ներկայացուցիչներից է, օպ-արտ ուղղության հիմնադիրը և նախահայրը: Սահմանելով ձևի-գույնի միասնության սկզբունքը` Վազարելին ստեղծել է «գեղարվեստի այբուբենը», որի բաղկացուցիչ «հիմնատարրերը» գույնի և ձևի վերադասավորումների ու փոխակերպումների արդյունքում առաջացնում են հորինվածքների անսահմանափակ համակցություններ: Մշակելով «գեղարվեստի այբուբենը»՝ որպես գեղարվեստի համամարդկային լեզու, Վազարելին ձգտում է արվեստը հասանելի դարձնել յուրաքանչյուրին, նպաստել արվեստի և հասարակության ներդաշնակությանը: «Վիկտոր Վազարելի. Օպտիկական հեռանկարներ» ցուցահանդեսի շրջանակներում գործող «Օպ-արտ. գույնի և ձևի փոխակերպումներ» կրթական ծրագիրը նպաստում է Վազարելիի բազմակողմանի արվեստի բացահայտմանը, ինչպես նաև երեխաների ստեղծագործական մտքի զարգացմանը:
