«Հայ-թուրքական գործընթացում մենք ոչ մի փոփոխություն չունենք: Երբ արձանագրությունները Թուրքիայի խորհրդանից դուրս եկան, թուրքական կողմը դա բացատրեց տեխնիկական կողմով: Այն ժամանակ արդեն հարց առաջացավ` սա միայն տեխնիկակա՞ն է, թե՞ դրա տակ կար այլ հարց». խոսելով հայ-թուրքական արձանագրությունները Թուրքիայի խորհրդարան վերադարձնելու փաստի մասին` այսպիսի կարծիք արտահայտեց քաղաքական փորձագետ Կարեն Բեքարյանը:
Նրա խոսքով` բանակցային կողմերից մեկը միակողմանի կատարել էր քայլ, միակողմանի էլ այդ քայլը հետ վերցրեց, հետևաբար ակնկալիքների առաջացման հիմնավորման մասին խոսք գնալ չի կարող: «Հայաստանն ինչ-որ քայլ չունի անելու, քայլ անելու հերթը Թուրքիայինն է: Արձանագրություններից դուրս կամ այդ դաշտում այդ քայլը պետք է նրանը լինի: Եվ այդ քայլը ոչ թե պիտի լինի իմիտացիոն, աշխարհի աչքերին թոզ փչելու համար, այլ իրական»,- ասաց Կ. Բեքարյանը` բերելով Աղթամարի եկեղեցու օրինակը:
«Աշխարհին հայտարարեցին` վերակառուցում ենք եկեղեցին, հետո մի մեծ PR ակցիա արեցին` ասելով, թե եկեղեցին պատրաստ է իր դռները բացել, հետո պարզվեց՝ խաչ չի լինելու, վա՛յ, հետո պարզվեց` շատ մեծ զիջում է դա դնելը, հետո առանձին դրան անդրադարձան: Լավ, անհարմար է»,- նշեց նա` ընդգծելով, որ դա դառնում է թոփ նյուզ, և հայկական լրատվամիջոցները մուլտիպլիկացիայի օրինակով աշխատում են այդ լուրերի վրա:
Բանախոսի խոսքով` պետք չէ ընկնել մտացածին բաների հետևից, այլ պետք է նայել իրականությանը: Իսկ փաստն այն է, որ ունենք այսօր փակ սահման:
«Փակ սահմանը թշնամական գործողություն է: Եվ եթե մենք խոսում ենք հնարավոր առաջընթացի մասին, ապա Թուրքիան պետք է իր իսկ կողմից փակած սահմանը բացի, վերացնի Հայաստանի շրջաակումն ու հաստատի դիվանագիտական հարաբերություններ, որի չլինելը պայմանավորված է Թուրքիայի կեցվածքով:
